Read Boros Dusun BUDALAN 27 Bible Online

BUDALAN 27 - Boros Dusun bible

BUDALAN 27

¹”Kudu nyieun hiji altar tina kayu pilang, pasagi, panjangna jeung rubakna masing-masing 2,2 meter, jangkungna 1,3 meter.

²Dina opat juru luhurna kudu make tatandukan dihijikeun kana altarna. Altar katut tatandukanana saluluar kudu dilapis ku tambaga.

³Kudu nyieun dulangna pikeun wadah lebu, sosodokna, bokor-bokor, garpuhna, jeung piring-piringna pikeun wadah ruhak. Kabeh dijieunna kudu ku tambaga.

⁴Kudu nyieun panggarangan tina tambaga, unggal juruna kudu diceulian keur cecekel tina tambaga.

⁵Teundeun eta panggarangan handapeun biwir altar, beungeut luhurna kudu nepi ka satengahna tina jangkungna altar.

⁶Kudu nyieun rancatan altar tina kayu pilang anu dilapis ku tambaga.

⁷Corokkeun rancatanana kana ceuli altar dua beulahanana lamun eta altar rek dipindahkeun.

⁸Altarna dijieunna ku papan dikolowongkeun, sakumaha anu ku Kami diterangkeun ka maneh di gunung.”

⁹”Kemah Tepangan Kami teh kudu make palataran anu dikubeng ku reregan tina lenen anu lemes. Panjang reregan palataran sisi kidul kudu 44 meter,

¹⁰dipasangna kana dua puluh tihang tambaga anu masing-masing make tatapakan tambaga. Kakait tihangna jeung papalang-papalangna tina perak.

¹¹Latar sisi kaler oge sarua kudu kitu.

¹²Reregan palataran sisi kulon panjangna 22 meter, tihangna sapuluh, tatapakanana sapuluh.

¹³Palataran sisi wetan, anu aya lawangna, rubakna 22 meter.

¹⁴Reregan kenca katuhueun lawangna masing-masing 6,6 meter, tihangna tilu-tilu, tatapakanana tilu-tilu.

¹⁶Reregan lawangna panjangna kudu 9 meter tina lenen lemes anu ditinun jeung benang wol warna biru, wungu, jeung beureum, jeung kudu disulam, tihangna opat, tatapakanana opat.

¹⁷Tihang-tihang anu ngurilingan palataran kudu disambungkeun ku papalang-papalang tina perak, kakait-kakaitna tina perak, tatapakan-tatapakanana tambaga.

¹⁸Ukuran palataran panjangna kudu 44 meter, rubakna 22 meter, luhurna 2,2 meter. Rereganana kudu lenen lemes, tatapakanana tambaga.

¹⁹Paparabotan anu dipake di jero Kemah, kitu deui pancuh-pancuh Kemah jeung pancuh-pancuh palataranana kabeh tambaga.”

²⁰”Parentahkeun ka urang Israil kudu marere minyak jetun anu pangherangna, pikeun ngaminyakan palita di Kemah, supaya bisa diseungeut unggal peuting.

²¹Eta palita di Kemah Tepangan Kami anu pernahna di luareun reregan hareupeun Peti Perjangjian, diseungeutna kudu ku Harun saanak-anak. Seungeut eta palita payuneun Kami, kudu hurung terus ti sore nepi ka isuk. Ieu kamistian kudu dijalankeun sapapanjangna ku urang Israil turun-tumurun.”