Read Boros Dusun BUDALAN 35 Bible Online

BUDALAN 35 - Boros Dusun bible

BUDALAN 35

¹Musa ngumpulkeun sakumna bangsa Israil, geus kitu ngalahir, ”Kieu timbalan PANGERAN anu ku maraneh kudu diarestokeun:

²Maraneh kudu digarawe teh genep poe bae. Poe nu katujuh poe suci, poe reureuh anu hidmat pikeun Kami, PANGERAN. Saha-saha anu barang gawe dina poe eta pasti kudu dipaehan.

³Dina poe Sabat mah teu meunang ngahurungkeun seuneu-seuneu acan di imah.”

⁴Ngalahir deui Musa ka sakumna bangsa Israil, ”Kieu anu didawuhkeun ku PANGERAN.

⁵Maraneh kudu mere derma haturan PANGERAN, saha bae anu rido, naon bae mana suka, naon anu rek didermakeun: emas, perak, tambaga;

⁶lenen lemes, wol biru, wol wungu, wol beureum; lawon tina bulu embe;

⁷kulit domba beunang ngabeureuman; kulit lemes; kayu pilang;

⁸minyak pikeun palita; bahan-bahan wawangian keur minyak pangistrenan jeung pikeun seuseungitan anu arum;

⁹batu angkik jeung sarupaning batu permata lianna, tareteskeuneun dina epod jeung oto Imam Agung.”

¹⁰”Sakur anu baroga kaahlian barang jieun, kudu nyarieun barang-barang pamundut PANGERAN, nya eta:

¹¹Kemah, lapisna, tutup luarna, cacantel-cacantelna, papan-papanna, papalang-papalangna; tihang-tihangna jeung tatapakan-tatapakanana;

¹²Peti Perjangjian, tutup pangrapihna, rancatanana jeung unak-anikna;

¹³meja, rancatanana, paparabotanana sapuratina katut roti suci haturan Allah;

¹⁴suku palita salengkepna jeung palita-palitana kitu deui minyakna;

¹⁵altar pangukusan, rancatanana, minyak pangistrenan, jeung seuseungitan anu arum; reregan pikeun lawang Kemah;

¹⁶altar paranti kurban beuleuman katut panggaranganana tina tambaga, rancatanana, kitu deui pakakas-pakakasna; jolang paranti kukumbah jeung dadamparna;

¹⁷reregan palataran, tihang-tihangna katut dadamparna, reregan pikeun lawang palataran;

¹⁸pancuh-pancuh Kemah jeung tambang-tambangna; kitu deui pancuh-pancuh jeung tambang-tambang pikeun di palataranana;

¹⁹pakean agreng para imam paranti babakti di Kamar Suci, nya eta pakean suci pikeun Imam Harun jeung anak-anakna.”

²⁰Ti dinya urang Israil bubar ti payuneun Musa.

²¹Geus kitu murubul deui marawa pangabakti haturkeuneun ka PANGERAN sasukana-sasukana, nya eta bahan-bahan pikeun nyieun Kemah Tepangan, pikeun nyieun paparabotan paranti ngabakti, kitu deui bahan pikeun nyieun pakean imam.

²²Anu daratang teh awewe lalaki sakur anu rido ngahaturkeun pangbakti ka PANGERAN. Aya anu mere panitih, anting, ali, kongkorong, jeung perhiasan emas lianna, dibaktikeun ka PANGERAN.

²³Aya anu mere lenen lemes, wol biru, wol wungu, wol beureum; lawon bulu embe, kulit domba beunang ngabeureuman, jeung kulit anu lemes.

²⁴Anu kuatna mere perak atawa tambaga, merena eta, dibaktikeun ka PANGERAN. Anu boga kayu pilang pikeun dijieun naon bae, merena eta.

²⁵Para wanita anu barisa ngagintir, nyaranggakeun benang lenen anu lemes, jeung benang wol warna biru, wungu, jeung beureum, beunang maranehna ngagintir.

²⁶Maranehna nyarieun oge benang tina bulu embe.

²⁷Para pamingpin aya anu mere batu ratna-campaka, aya anu mere batu-batu permata lianna, tareteskeuneun dina epod jeung oto;

²⁸aya anu marere bahan-bahan wawangian jeung minyak pikeun lampu, pikeun nyieun minyak pangistrenan, jeung pikeun seuseungitan anu arum.

²⁹Urang Israil rarido ngabakti ka PANGERAN, pikeun nyieun barang-barang anu ku PANGERAN geus diandikakeun ka Musa.

³⁰Geus kitu Musa ngalahir ka urang Israil, ”PANGERAN geus nyaur Besalel bin Uri, incu Hur, ti kaom Yuda.

³¹Ku Allah geus dieusian ku pangawasa-Na, dipaparin kabinangkitan jeung pangabisa, ngarti kana nyieun sarupaning barang seni,

³²ahli ngareka barang-barang tina emas, perak, tambaga, reujeung migawena;

³³ahli meulah inten pikeun diukir dijieun barang-barang perhiasan, ahli ngukir kayu jeung sarupaning barang seni.

³⁴Manehna jeung Oholiab bin Ahisamak ti kaom Dan geus disina saranggupeun ngajarkeun pangabisana ka anu sejen.

³⁵Oholiab ku PANGERAN dipaparin pangabisa nyieun sarupaning barang ukiran, nyieun model-model, migawe lenen lemes, wol biru, wol wungu, wol beureum jeung lawon lianna. Duanana sanggup nyieun rupa-rupa barang jeung mikiran model-modelna.