Read Boros Dusun BUDALAN 36 Bible Online

BUDALAN 36 - Boros Dusun bible

BUDALAN 36

¹Besalel, Oholiab, jeung tukang-tukang anu sejen, anu ku PANGERAN geus dipaparin pangabisa jeung kanyaho, anu ngalarti kana sagala rupa anu tumali jeung kaperluan nyieun Kemah Suci, kudu nyieun eta barang-barang sakumaha timbalan PANGERAN.”

²Geus kitu Musa nyaur Besalel, Oholiab, jeung tukang-tukang anu sejen, anu ku PANGERAN geus dipaparin pangabisa tur iklas ngabarantu barang gawe, ditimbalan mimiti digarawe.

³Barang-barang pangbakti ti urang Israil pikeun kaperluan nyieun Kemah Suci tea ku Musa diserenkeun ka maranehna. Tapi unggal isuk urang Israil teh merul keneh bae marawa pangbakti ka Musa.

⁴Anu matak tukang-tukang teh

⁵arunjukan ka Musa, ”Hatur uninga, derma ti jalmi-jalmi teh parantos seueur teuing, langkung ti anu kedah dianggo ngadamelan barang-barang anu dipiwarang ku PANGERAN.”

⁶Ti dinya Musa miwarang ngiderkeun parentah ka pasanggrahan, yen derma pikeun Kemah Suci teh eureunan bae, tong aya anu derma deui. Geus kitu kakara jelema-jelema teh eureun dermana.

⁷Ari derma-derma anu geus asup geus leuwih ti cukup pikeun nganggeuskeun sagala rupa barang anu kudu dijieun.

⁸Ari Kemah Tepangan PANGERAN dijieunna teh ku tukang-tukang anu pangpinterna. Mimitina nyieun rereganana, tina lenen lemes sapuluh gebar, anu ditinun jeung wol warna, biru, wungu, beureum, tuluy disulam ku sulaman-sulaman anu direka mukarabin.

⁹Tiap gebar saukuran, panjang dua welas meter, rubak dua meter.

¹⁰Anu lima gebar diranjingkeun, dijait dijieun sagebar. Pon kitu anu lima gebar deui.

¹¹Sisi luar gebaran unggal setel ku maranehna diberean kakantet-kakantet tina lawon biru,

¹²lima puluh kakantet dina gebaran nu hiji setelan kahiji, dicangreudkeun kana lima puluh kakantet anu aya dina tungtung gebaran setelan anu kadua.

¹³Maranehna nyieun lima puluh kakait emas, tuluy anu dua gebaran teh dihijikeun ku eta kakait-kakait.

¹⁴Tuluy nyieun lapis Kemah tina lawon bulu embe sawelas gebar,

¹⁵kabeh saukuran, panjang tilu welas meter, rubak dua meter.

¹⁶Anu lima gebar diranjingkeun dijait dijieun sagebar, pon kitu anu genep gebar deui.

¹⁷Dina sisi gebaran panungtung setelan nu hiji ku maranehna diberean lima puluh kakantet, kitu keneh dina sisi gebaran setelan nu hiji deui lima puluh kakantet.

¹⁸Ti dinya nyieun kakantet-kakantetna tina tambaga, lima puluh siki pikeun ngantetkeun eta anu dua gebar sina ngahiji.

¹⁹Seug nyieun deui lapis, dua gebar, nu hiji tina kulit domba beunang ngabeureuman, nu hiji deui tina kulit lemes, pikeun tutup Kemah beulah luar.

²⁰Geus kitu nyieun papan-papan anu lalempeng tina kayu pilang, pikeun Kemah.

²¹Ukuran masing-masing panjang opat meter, rubak genep puluh genep sentimeter,

²²marake dua pupurus supaya bisa diranjing-ranjingkeun. Unggal papan kabeh make pupurus kitu.

²³Papan pikeun pongpok kidul nyieun dua puluh lembar,

²⁴katut opat puluh tatapakanana tina perak pikeun nahan dua pupurus handap, sapapanna dua tatapakan.

²⁵Pikeun kemah pongpok kaler nyieun dua puluh papan,

²⁶katut tatapakan perakna opat puluh, sapapanna dua tatapakan.

²⁷Pikeun pongpok Kemah beulah tukang beh kulon nyieun genep papan.

²⁸Pikeun popojok-popojokna masing-masing dua papan.

²⁹Papan dina popojok diranjingkeunana tina dasar nepi ka congo luhur. Kitu petana masang papan pojok, sina nyiku.

³⁰kabehna aya dalapan papan pojok katut genep welas tatapakan perakna, sapapanna dua tatapakan.

³¹Ti dinya nyieun papalang-papalangna tina kayu pilang. Pikeun nahan papan-papan pongpok Kemah beulah ditu lima papalang,

³²pikeun nahan papan-papan pongpok beulah dieu lima papalang, pikeun nahan papan-papan pongpok tukang beulah kulon lima papalang.

³³Papalang-papalang anu panengah dipalangkeunana satengahna tina luhurna papan-papan, malang ti tungtung Kemah beulah dieu nepi ka tungtung beulah ditu.

³⁴Papan-papanna kabeh dilapis ku emas, kabeh marake imah tulak tina emas paragi nyorokkeun papalang-papalang. Papalang-papalangna oge kabeh dilapis ku emas.

³⁵Ti dinya nyieun deui reregan tina lenen lemes anu ditinun jeung wol warna biru, wungu jeung beureum, sarta disulam ku sulaman-sulaman anu direkakeun mukarabin.

³⁶Geus kitu nyieun tihang reregan opat tina kayu pilang lapis emas, make kakait-kakait tina emas, jeung opat tatapakanana tina perak.

³⁷Reregan pikeun lawang kemah lawonna lenen lemes anu ditinun jeung wol warna biru, wungu, jeung beureum, dihias ku sulaman.

³⁸Pikeun tihang rereganana nyieun lima, make kakait-kakait. Congo-congo tihang jeung papalang-papalangna kabeh dilapis ku emas, katut lima tatapakanana tina tambaga.