Read Boros Dusun BUDALAN 40 Bible Online

BUDALAN 40 - Boros Dusun bible

BUDALAN 40

¹PANGERAN nimbalan ka Musa,

²”Kemah Tepangan PANGERAN teh adegkeun dina tanggal hiji bulan kahiji.

³Peti Perjangjian anu dieusi Sapuluh Timbalan tea simpen di eta Kemah, halangan ku lalangse ti hareupna.

⁴Meja ka jerokeun, parabotna tatakeun. Suku palita asupkeun, palita-palitana terapkeun.

⁵Altar emas pangukusan teundeun hareupeun Peti Perjangjian, lawang Kemahna alingan ku lalangse.

⁶Altar kurban beuleuman teundeun hareupeun Kemah.

⁷Jolang paranti kukumbah teundeun antara Kemah jeung altar, eusian cai.

⁸Jieun palataran Kemah, kubeng, lawangna alingan ku lalangse.

⁹Kemah jeung paparabotanana istrenan, lisahan ku minyak suci supaya jadi suci.

¹⁰Tuluy altar jeung paparabotanana istrenan, lisahan ku minyak suci, tanwande jadi suci.

¹¹Pon kitu jolang paranti kukumbah jeung alasna, sucikeun saperti kitu.

¹²Harun jeung anak-anakna bawa ka lawang Kemah, tuluy sina mandi suci.

¹³Harun dangdanan ku pakean imam, lisahan sangkan jadi suci, layak jadi imam anu ngawula ka Kami.

¹⁴Anak-anakna kamejaan,

¹⁵tuluy lisahan saperti bapana, supaya jaradi imam ngawulaan Kami. Ieu pangistrenan bakal ngukuhkeun maranehna jeneng imam saterusna.”

¹⁶Musa ngajalankeun piwarangan PANGERAN.

¹⁷Dina tanggal hiji bulan kahiji, taun kadua ti barang kaluar ti Mesir, Kemah Tepangan PANGERAN geus nangtung.

¹⁸Ku Musa geus dilantean, dipapanan, dipapalangan, tihang-tihangna geus ditangtungkeun,

¹⁹lapis-lapis Kemah beulah jero jeung tutup luarna geus diterapkeun sakumaha timbalan PANGERAN.

²⁰Papan batu anu dua gebleg tea ku Musa geus diasupkeun ka jero Peti Perjangjian, rancatan petina geus dicorokkeun kana geugeulanganana, tutup petina geus dipasang di luhurna.

²¹Petina disimpen di jero Kemah, jeroeun lalangse aling-aling, jadi eta Peti Perjangjian teh dibunikeun, sakumaha dipiwarangna ku PANGERAN.

²²Ari meja diteundeunna di jero Kemah teh di sisi kaler luareun reregan,

²³sarta roti haturan PANGERAN ditata dina eta meja sakumaha dipiwarangna ku PANGERAN.

²⁴Ari suku palita diteundeunna di Kemah teh di sisi kidul, paeunteung-eunteung jeung eta meja,

²⁵sarta palita-palitana geus diseungeut di payuneun PANGERAN, sakumaha dipiwarangna ku Mantenna.

²⁶Altar emas ku anjeunna diteundeunna di jero Kemah, hareupeun reregan,

²⁷seug dibeuleuman seuseungitan anu arum sakumaha timbalan PANGERAN.

²⁸Lawang kemah geus dialingan ku lalangse,

²⁹sarta di hareupeun lalangsena Musa neundeun altar paranti kurban beuleuman jeung kurban gandum, sakumaha dipiwarangna ku PANGERAN.

³⁰Jolang paranti kukumbah diteundeunna di antara Kemah jeung eta altar, dieusian cai.

³¹Musa, Harun, jeung putra-putra Harun, kudu wawasuh heula panangan jeung sampean ku cai tina eta jolang,

³²samemeh lebet ka jero Kemah atawa nyampeurkeun altar, sakumaha timbalan PANGERAN.

³³Palataran sakuriling Kemah jeung altar ku Musa geus dipidamel, lawang palataranana geus dialingan ku lalangse. Geus kitu sagala padamelan Musa teh beres.

³⁴Geus kitu Kemah teh diliputan ku mega bray aya cahaya matak serab nandakeun yen PANGERAN hadir ngeusian eta Kemah.

³⁵Ku hal eta Musa jadi teu iasa lebet.

³⁶Ari urang Israil, samangsa-mangsa eta mega unggah ti Kemah, bral parindah masanggrahanana.

³⁷Sapanjang eta mega tacan unggah mah maranehna tacan waka parindah masanggrahanana.

³⁸Sapanjang maranehna ngalalakon di jalan, eta mega anu nandakeun yen PANGERAN hadir teh mun ti beurang katembong mayungan Kemah, mun ti peuting katembong ngagebur luhureun Kemah.