Read Boros Dusun AYUB 10 Bible Online

AYUB 10 - Boros Dusun bible

AYUB 10

¹Abdi parantos teu kiat hirup, wungkul ngarasakeun kapeurih.

²Atuh Gusti teh ulah mung nyalahkeun bae, sebatkeun lantaranana nu matak ijid ka abdi.

³Naon maksad Gusti dugi ka telenges kitu? Naha ngahaja bae bade ngapeskeun dadamelan ku Anjeun, bade ngayunkeun pangreka jelema jahat?

⁴Ari Gusti ningali perkara teh sami sareng jalmi?

⁵Ari yuswa Gusti sami sareng umur manusa?

⁶Naha atuh dosa abdi dugi ka disusud-susud, kalepatan abdi dugikeun ka dikorehan?

⁷Gusti kena-kena uninga yen abdi mo aya nu bisa nulung, najan bener ge tetep bae disalahkeun.

⁸Pedah abdi kenging Gusti ngawangun sareng ngarakit, heug Gusti ngaraos wenang ngaruksak deui.

⁹Pedah abdi dipidamel tina taneuh porang, bade diremukkeun dijadikeun deui lebu?

¹⁰Gusti ka pun bapa maparin tanaga, supados abdi tiasa yuga. Di jero kandungan abdi ku Gusti dibayuan.

¹¹Raga abdi ku Gusti diwangun ku tulang, dianyam ku urat sarap, tulang dibungkus ku daging sareng kulit.

¹²Lajeng dipaparin nyawa, didama-dama, dijaga diraksa, dugi ka usik tiasa hirup.

¹³Ayeuna mah abdi terang, sihoreng sapanjang kitu teh cicing-cicing Gusti bade nyilakakeun abdi.

¹⁴Manahoreng abdi dijieun geusan intipeun, teanganeun kasalahan, sangkan teu layak kenging hampura.

¹⁵Teu kaop lepat saeutik sok jebet bae digitik. Sawangsulna ari bener, ukur diapilainkeun. Mani seubeuh ku Gusti dihihina dikakaya.

¹⁶Teu kaop mun ningali abdi menyat, Gusti mani kawas singa, sebrut ngudag buru-buru, malah pinton kasaktian, ngarah abdi cilaka.

¹⁷Tur Gusti mah tara kirang-kirang saksi keur nuding ka abdi sangkan aya jalan geusan bendu teterasan. Mun hoyong ngagitik deui, Gusti tara kirang-kirang akal.

¹⁸Naha atuh abdi kapungkur diantep lahir ka dunya? Matak naon mun teras bae paehkeun, memeh katingal ku pada jalma!

¹⁹Langkung sae tina kandungan teh antepkeun burusut tuluy ti batan diantep hirup.

²⁰Parantos atuh abdi teh tinggalkeun, da moal lami deui ge sakarat, samemeh hos hayang bisa minge heula.

²¹Moal datang ka teu hilang, moal mulang-mulang deui, mulang ka alam nu poek mongkleng,

²²alam nu peteng ngajumbleng turta pakusut, cahaya ge di dinya mah angger-angger poek.”