Read Boros Dusun AYUB 13 Bible Online

AYUB 13 - Boros Dusun bible

AYUB 13

¹Eta omongan, saucap-ucapna pikeun kuring mah teu aneh deui. Lain ngan anjeun bae, kuring ge nyaho taya kacekna.

³Kuring kukulutus teh lain ka aranjeun, tapi ka Allah, rek ngabela perkara kuring.

⁴Aranjeun teh bodo, tapi pura-pura pinter, nyeta-nyeta dukun lepus padahal taya kamampuh.

⁵Mending repeh, sugan bae disangka pinter!

⁶Anggursi dengekeun, heug ngaraskeun ka kuring.

⁷Rek naon bohong pipinteranan? Kutan rek ngabantu Allah ku bohong?

⁸Arek sasanggupanan mantuan ka Mantenna, arek ngabela perkara Mantenna di pangadilan?

⁹Lamun diri aranjeun ku Mantenna ditoong ditempo, aya kira-kirana nu hade di dinya? Dikira Allah iasa dibobodo kawas aranjeun ngabobodo manusa?

¹⁰Kereteg prasangka anu buni ge, mo burung ku Mantenna diseukseukan,

¹¹kakawasaan Mantenna bakal nagiwurkeun anjeun.

¹²Papatah-papatah aranjeun lir kebul, taya gunana. Pangbantah-pangbantah aranjeun lembek kawas taneuh porang.

¹³Jadi, mending repeh, kuring rek nyarita. Balukarna mah kumaha engke.

¹⁴Geus nekad, paeh hirup kumaha behna.

¹⁵Rek dipaehkeun oge ku Allah mangga teh teuing, da puguh geus taya pisan harepan. Jadi matak naon mun balaka ngabela sagala laku lampah ka Mantenna.

¹⁶Malah ceuk rarasaan, wani kieu teh asa matak salamet, da ari nu jahat mah piraku wani kieu ka Allah.

¹⁷Jadi, bandungan ieu omongan kuring.

¹⁸Kuring geus tarapti, omongan enggeus diatur, sabab yakin diri kuring bener.

¹⁹Ya Allah, leres Gusti teh bade nuding ka abdi? Upami leres, teu sawios abdi seja repeh dugi ka paeh.

²⁰Nanging gaduh dua rupi panuhun. Upami dikabul, abdi moal dugi ka nyumput ti kersa Gusti.

²¹Kahiji, abdi ulah hantem bae disiksa, kadua, ulah dibegbregan bae ku kasieun.

²²Bilih bade Gusti heula nu nyual, mangga, abdi nu ngawangsul. Bilih kedah abdi heula, mangga, Gusti anu ngawaler.

²³Mangga sebatkeun bae, sakumaha seueurna kalepatan sareng dosa abdi, sebatkeun bae, naon kajahatanana.

²⁴Ku naon Gusti teh mungkur ti abdi, ku naon abdi teh dianggap musuh?

²⁵Bade ngagebrag? Abdi mah ukur kalakay, gampil diramesna, sakadar jarami garing, gampil diririkesna.

²⁶Anu pait anu peuheur, breg ku Gusti dibegbregkeun ka diri abdi, malah kasalahan nu enggeus-enggeus ge begbregkeun sakalian.

²⁷Suku dibangkol, dirante, unggal lengkah diawaskeun, malah ka tapak-tapakna dugi ka dilelekan.

²⁸Atuh tangtos bae abdi teh ngarempeyek jeg kai bobo, jeg baju dihakanan geget dugi ka karancang.