Read Boros Dusun AYUB 16 Bible Online

AYUB 16 - Boros Dusun bible

AYUB 16

¹”Pamanggih kitu mah kuring ge mindeng ngadenge. Bororaah jadi pangbeberah, kalah ka ngagerihan hate.

³Rek hayoh bae nyorocos nepi ka kiamat? Moal beak-beak piomongeun?

⁴Mun seug anjeun jadi kuring sarta kuring jadi anjeun, kuring oge bisa ngomong kitu, malah bari rek manggut-manggut nandakeun luhur panemu, piraku anjeun teu palid ku omongan kuring,

⁵nu dieusi bongbolongan jeung pangbeberah, ngalelemu ku kecap-kecap anu garenah.

⁶Ieu kanyeri henteu bisa kabangbrangkeun mun dibawa repeh. Dalah dikumaha.

⁷Ya Allah, awak abdi ku Gusti disasaak, anak tumpes ku Gusti sina paraeh.

⁸Sihoreng Gusti teh musuh, tega nganiaya ka abdi dugi ka ngajangjawing kieu kantun kulit sareng tulang. Ku batur mah dipajarkeun cingcirining gede dosa.

⁹Ku Allah disasaak, anggahota awak pasiksak. Socana ka kuring mani hurung awahing ku cua.

¹⁰Ku jalma dijarebian, dirogrog ditampilingan,

¹¹ku Allah diserenkeun ka jalma-jalma doraka.

¹²Eukeur jongjon hirup ngahenang-hening, ku Allah ujug-ujug dicekek, digaley, dibantingkeun, seug dijieun bubulanan purah nadahan panarajang-Na,

¹³nadahan panah-Na ti unggal juru, mani rancleb kana awak, teu watir-watireun,

¹⁴ceplok deui, ceplok deui, awak geus pinuh ku raheut. Narajang-Na jeg serdadu geus edan awahing ku ijid-ijidna.

¹⁵Barang pake ge karung, kawantu eukeur prihatin, andiprek dina kebul nyirikeun asor.

¹⁶Beungeut asak balas ceurik balilihan, panon carindul tingguliweng semu geuneuk.

¹⁷Padahal mah kuring teh iraha kejem ka batur. Jadi kuring sasambat teh kalawan satemenna.

¹⁸Cik bumi, tong ngilungan lampah nu jahat ka kuring! Ulah nyicingkeun panyeluk kuring menta kaadilan!

¹⁹Sina kadangu ku nu di sawarga, nu baris tandang melaan kuring.

²⁰Babaturan maroyokan kuring bati bisa cipanonan, bari lumengis ka Allah.

²¹Hayang teh aya nu melaan kuring di payuneun Allah kawas nu melaan sobatna.

²²Taun-taun umur kuring geus laliwat, kuring nyorang jalan taya pigeusaneun malikan deui.