Read Boros Dusun AYUB 17 Bible Online

AYUB 17 - Boros Dusun bible

AYUB 17

¹Hirup kuring geus meh tutup, napas geus meh beak tinggal kuburan nu geus ngajogo.

²Geus kawangwang, pisakumahaeun bangetna bala rea moyokna.

³Kitu Gusti, ari sabalakana mah. Tampi atuh pihatur abdi teh, da ku pada jalma mah henteu dianggap,

⁴kawantu maranehna ku Gusti dihaja, sina lalepat nimbangna perkawis abdi. Matak naon upami ayeuna ulah sina karitu bae.

⁵Aya paribasa: Anu nepi ka tega ka sobat pedah aya piuntungeun, anu keuna ku wawalesna teh anakna.

⁶Eta paribasa ku maranehna dilarapkeun ka abdi, geus bae anu ngadararenge kitu teh ka darieu, ngadon nyariduhan kana beungeut.

⁷Panon celong asa lolong balas ceurik balilihan, suku leungeun kantun sagede-gede elekan.

⁸Anu arumangkeuh jujur mani tingraranjug, mani nuding-nuding magar abdi jalma murtad.

⁹Anu baroga rasa yen dirina mah mulya beresih, pok deui, pok deui nyebut yakin yen panudingna kitu teh bener.

¹⁰Padahal lamun seug maranehna daratang sareng narangtung di dieu, saurang ge ku abdi moal kapendak aya anu bijaksana.

¹¹Umur abdi meh lastari, harepan parantos musna, kahayang teu aya nu laksana.

¹²Nanging ku ieu sobat-sobat, peuting dipajarkeun beurang, majar teh sakeudeung deui ge caang, ongkoh sidik abdi teh ripuh, nuju poek samagaha.

¹³Ayeuna mah parantos teu aya kahayang, lian ti hayang enggal-enggal meuntas ka alam kubur, hayang enggal-enggal ngagojod di alam poek,

¹⁴seja ngabapa kana astana, ngindung midulur ka cacing-cacing anu baris ngahakanan ieu jisim.

¹⁵Lebah mana ayana harepan pikeun abdi, sarupa mah? Cik saha anu ningal, sarupa mah?

¹⁶Ari parantos pindah ka alam kubur mah, parantos teu aya harepan nanaon deui.”