Read Boros Dusun AYUB 18 Bible Online

AYUB 18 - Boros Dusun bible

AYUB 18

¹”Ayub! Kuring mah heran, bet anjeun anu keur kitu make teu bisa repeh. Cik eureun ngomong teh, dengekeun batur.

³Na dikira batur teh bodo kawas kebo?

⁴Geuning eta kalah ka ripuh da ambek-ambekan bae. Naha kitu keur kapentingan anjeun jagat kudu runtag, gunung kudu urug?

⁵Cahaya jalma jahat mah bakal dipareuman terus, moal diseungeut deui, moal dihurungkeun deui,

⁶lampu di jero kemahna baris disina poek.

⁷Ngalengkahna memang teteg, tapi terus titajong, bluk bae labuh jadi korban polahna sorangan.

⁸Leumpang nyampeurkeun jiret, sukuna kasarimped

⁹keuneungna kajepit ku tataheunan teu bisaeun deui incah.

¹⁰Dina taneuh lebah nu buni aya jiret, dina jajalaneunana aya nu masangan pitapak.

¹¹Balai ngintip sakurilingna, nutur-nutur lengkahna.

¹²Urut beunghar jadi kalaparan, mana dikikintil ku balai.

¹³Awak digulung ku kasakit anu mateni, nepi ka leungeun jeung sukuna buruk.

¹⁴Seug ditongtak ti imah tempat senangna, disered ka hareupeun Malakalmaot.

¹⁵Ari imahna diandih batur, saha bae nu daekeun, kitu ge sanggeus disemprotan heula ku walirang, dibasmi heula kuman-kumanna.

¹⁶Mun tangkal mah akarna paeh, dahanna gararing.

¹⁷Ulah boro ku anu jauh, ku nu di imahna ge geus tara disebut-sebut, geus tara diinget-inget.

¹⁸Geus dibuang ti dunyana nu harirup, disuntrungkeun ti nu caang ka nu poek.

¹⁹Heug teu boga anak, euweuh keur nuluykeun turunan.

²⁰Sakur anu ngadarenge nasibna, ti wetan nepi ka kulon ukur bati kukurayeun, sieun ngalaman nu kawas kitu.

²¹Kitu bagianana jalma doraka mah. Jalma anu teu ngandel ka Allah mah kabeh oge kitu wawalesna.”