Read Boros Dusun AYUB 20 Bible Online

AYUB 20 - Boros Dusun bible

AYUB 20

¹”Beu, nepi ka kituna Ki Ayub! Kapaksa ieu mah kudu ditimpalan.

³Make ngancam sagala. Tapi kuring nyaho kudu kumaha nakisna.

⁴Anjeun tangtu nyaho, ti jaman baheula, ti barang di dunya aya manusa,

⁵acan aya jalma jahat nu lana hirup jamuga.

⁶Memang nu karitu oge osok naranjung laluhur, malah ceuk babasanna nepi ka maratan langit, sirahna nyundulan mega.

⁷Tapi mo teu buyar lir kekebul. Nu kungsi wawuh jeung eta kari heranna nu aya, pamikirna na ka mana lesna eta jelema!

⁸Teu beda ti impian atawa tetenjoan riwan ti peuting, leungit tanpa lebih, ilang tanpa karana, moal tembong-tembong deui,

⁹musna ti tempat matuhna.

¹⁰Kakayaan beunangna rarampas ti nu malarat kudu digantian ku anak-anakna.

¹¹Urut buta tulang buta daging, bet kudu gancang-gancang mulang ka jero taneuh.

¹²Kajahatanana karasaeun ngeunahna, ngadaharna dikemut lila dina sungutna, ngarah lila ngarasakeunana.

¹⁴Ari geus nepi ka jero beuteung bet molelel, pait teu beda ti racun.

¹⁵Tungtungna kakayaan beunangna rerebut teh kautahkeun deui, dirampas deui ku Allah, nu geus di jero beuteungna ge diudal.

¹⁶Nu diteureuyna teh lir racun. Tangtu si jahat teh bakal paeh kawas nu dipacok ku oray matih.

¹⁷Moal bisa terus hirup, moal nenjo walungan minyak jetun, moal nenjo susukan anu limpas ku susu jeung madu.

¹⁸Beubeunangan usahana bakal dipulangkeun ka batur, manehna mah moal ngasaan niʼmat kakayaanana.

¹⁹Kawantu beunang meres, beunang ngarangsadan ti nu malarat, imahna ge meunang ngajabel ti batur.

²⁰Ku sarakah-sarakahna nepi ka euweuh kaseubeuhanana.

²¹Daharna tara nyesakeun. Datang mangsana kamuktianana leungit.

²²Keur meumeujeuhna maju, beredeg ditempuh ku sagala bancang pakewuh.

²³Keun sina jembluk heula, da moal teu dihukum ku Allah. Moal teu bendu Allah teh ka dinya.

²⁴Tur moal bisa sumingkir, luput tina pedang beusi, moal teu ngudupung beunang ku gondewa tambaga.

²⁵Awakna parat ku jamparing, congo panah ngagurilap, cer bae getihna mancer, jajantungna ngajeletot.

²⁶Kakayaan beunangna ngadama-dama ledis sapisan, dirina saanak pamajikan tingjarungkel tutung kaduruk, duka seuneu ti mana da lain beunang manusa.

²⁷Dosana ku langit didingding-dingding, ku bumi dituding-tuding.

²⁸Kamuktianana dibasmi, beak palid ku bebendu Allah.

²⁹Tuh kitu bagianana jalma jahat mah. Kitu dipastikeunana ku Allah.”