Read Boros Dusun AYUB 23 Bible Online

AYUB 23 - Boros Dusun bible

AYUB 23

¹”Kuring tetep teu tarima, tetep tugenah ku Mantenna. Kumaha teu rek ngarasula?

³Atoh temen mun bisa manggihan Mantenna, ngan teu nyaho kudu ka mana neangna.

⁴Mun geus aya di payuneuna-Na mah, sagala hal kuring nu jadi kapanasaran, tangtu diunjukkeun, ditembrakkeun.

⁵Hayang nyaho rek ngadawuh kumaha, rek kumaha ngawaler-Na.

⁶Naha baris ngabantah tur nganggo sagala kakawasaana-Na? Sageuy! Sageuy Mantenna teu kersaeun nimbang.

⁷Balaka bae kuring mah arek silih tempas jeung Mantenna. Sageuy teu diangken, yen kuring teh ti bareto nepi ka ayeuna henteu salah naon-naon.

⁸Hanjakal, Mantenna diteang ka wetan teu nyampak, didongdon ka kulon kosong.

⁹Diteang ka kaler henteu kawenehan, tuluy disusul ka kidul, suwung, di dinya ge teu katingal.

¹⁰Parandene kitu, unggal kuring ngalengkah ge kadangueun, jadi upama kuring diuji teh tangtu kauninga lampah kuring teh beresih,

¹¹lantaran tigin nuturkeun tapak lacak-Na, tara nyimpang-nyimpang,

¹²salawasna nurut kana timbalana-Na, taʼat kana pangersa-Na, tara mawa karep sorangan.

¹³Mantenna tara owah gingsir, moal aya nu bisa ngarobah pamadegana-Na, moal aya nu bisa mapalangan kana sagala kersa-Na.

¹⁴Mantenna kagungan rarancang kacida lobana, aya sarupa anu rek dilarapkeun ka diri kuring, tur pasti ku Mantenna dilaksanakeun,

¹⁵nepi ka kuring sumeblak aya di payuneuna-Na, bawaning ku seber kabina-bina.

¹⁶Wawanen kuring nepi ka beak dipupul ku Nu Maha Kawasa. Nya ku Mantenna kuring ngarasa gimir teh, lain ku poek anu geus ngalolongkeun paningal kuring.