Read Boros Dusun AYUB 26 Bible Online

AYUB 26 - Boros Dusun bible

AYUB 26

¹”Euleuh, mani capetang kitu eta anjeun, ngabela kuring anu nya lemah nya nandang lara!

³Mani pertengtang mere bongbolongan ka jelema pantar kuring anu sakieu bodona!

⁴Cik, ka saha maksudna eta kasauran teh, ti saha meunang ilhamna.”

⁵”Arwah-arwah jelema nu geus maraot tingdaregdeg cai sapangeusina galumeter.

⁶Tempat pangancikan nu maraot nonggerak payuneun Allah, turub-turubna teu bisa ngalingan paningali-Na.

⁷Allah ngadingdingkeun langit di tungtung kaler, ngagantungkeun bumi di awang-awang nu suwung.

⁸Mantenna minuhan mendung ku cai, tur mendungna teu datang ka bedah.

⁹Bulan purnama direueukan ku mega.

¹⁰Caang dipisahkeun ti nu poek, wawatesanana ngagulimeng tepung gelang luhureun sagara.

¹¹Lamun tihang-tihang langit diinggeung-inggeung, seug eta teh genjlong, gumeter bawaning ketir.

¹²Ku pangawasa Mantenna laut datang ka tagiwur. Rahab si naga laut ge kasoran, tiwas ku kawijaksanaan Mantenna.

¹³Ku napas Mantenna bray langit lenglang, panangana-Na newak naga laut nu keur kabur, bek dipaehan.

¹⁴Eta anu sakitu poharana teh, kakara mangrupa kila-kilana bae tina kakawasaan Mantenna, minangka harewos-harewos-Na anu katepi ku ceuli urang. Geus komo teuing kaagungan Mantenna sagemblengna, pamohalan bisa kajugjugan.”