Read Boros Dusun AYUB 27 Bible Online

AYUB 27 - Boros Dusun bible

AYUB 27

¹”Kuring sumpah demi jumenenging Allah Nu Maha Kawasa, anu teu adil ka kuring, anu nganalangsakeun hate kuring,

³yen: Sapanjang Allah maparin keneh ambekan,

⁴paliyas ieu biwir ngucap goreng, ieu letah moal dibikeun ngabohong.

⁵Kana pamadegan aranjeun ge pamohalan ngabenerkeun, sarta nepi ka paeh ge keukeuh kuring teu rumasa boga salah.

⁶Seja kukuh dina cecekelan yen kuring bener, moal robah pipikiran yen yakin kitu.

⁷Mugia teuing anu ngabararantah ngalawan kuring sing nandangan hukumanana, tong dibedakeun ti nu jahat, ti nu garoreng lampahna.

⁸Lamun nyawana ku Allah geus dicararabut, cik eta anu marunapek teh rek kumaha!

⁹Dina waktu maranehna katarajang papait, naha panyambatna bakal didangu ku Allah?

¹⁰Keun sina galandrung hararayang meunang kabagjaan ti Allah, sina sasambat ka Mantenna teu eureun-eureun.

¹¹Sugan aranjeun teh kudu dipapatahan ku kuring, diwuruk hal agungna kawasaning Allah, sangkan nyaraho kumaha rarancang Mantenna Nu Maha Kawasa,

¹²sanajan eta teh kateuteu-ari, da ku aranjeun ge geus karasa. Na ku naon atuh anggur ngocoblak taya hartina?”

¹³”Kieu hukuman ti Anu Maha Kawasa ka nu doraka tur lalim:

¹⁴Pek sing laloba anak, tapi anak-anakna kabeh baris paraeh ku perang, incu-incuna karurang dahar.

¹⁵Nu barisa keneh hirup baris hus hos ditekukan ku panyakit, ku randana ge moal ieuh diceungceurikan.

¹⁶Pek baroga perak mangpeti-peti, papakean sababaraha lamari,

¹⁷tapi perakna kapimilikna mah ku nu jalujur, papakeanana dipakena mah ku jalma-jalma anu balageur.

¹⁸Imahna nangtungna moal lila-lila, cara ramat lancah, atawa sasaungan tukang tunggu kebon.

¹⁹Basa reup mondok mah beunghar, tapi panungtungan, da barang nyaring, kasugihanana geus euweuh.

²⁰Jol balahi narajang, lir caah ngadadak, wanci peuting dirina kapangpengkeun ku angin ribut,

²¹kabawa kabur ti imahna ku angin ti wetan.

²²Sabot roroesan hayang salamet, gebut ku angin dibeubeutkeun taya kawatir.

²³Barang keur lumpat, hiuk katebak deui ku angin, ngagelebug matak sieun, matak binasa.”