Read Boros Dusun AYUB 3 Bible Online

AYUB 3 - Boros Dusun bible

AYUB 3

¹Tungtungna Ayub nu mimiti buka soara, nyumpahan poe wedalna, saurna,

²”Ya Allah, mugi laʼnat poe wewedalan abdi, mugi laʼnat wengian abdi dicipta.

⁴Eta poe jadikeun poek, ya Allah. Tong diemut-emut deui tong disinaran ku caang deui.

⁵Sina medem sing ngajumbleng, dingdingan ku mendung hideung, ulah kasorot sang surya.

⁶Wengi eta dudut ti jero taun, tong dietang-etang deui,

⁷jieun wengi anu suwung, tuna tina kabungahan.

⁸Timbalkeun ka tukang tenung, nu tiasa ngagendam ka Lewiatan, sina nyapa eta poe,

⁹sina nyandet sinar bentang timur, sangkan eta wengi ulah katumbu balebat.

¹⁰Sing disapa eta wengi anu ngantep abdi dijurukeun, nepi ka abdi ayeuna nandang panyiksa.

¹¹Mun antep abdi teh kapungkur teu dijurukeun, atanapi antepkeun burusut tuluy.

¹²Keur naon abdi kapungkur dilalahun ku indung? Keur naon kapungkur disusuan ku anjeunna?

¹³Mun harita teras maot, ayeuna kantun genahna,

¹⁴genah mondok, lir raja sareng pangagung, anu nembe rengse ngadegkeun deui karaton-karatonna jaman baheula.

¹⁵Tibra mondok, lir para pangeran, nu tas ngeusian gedongna ku emas perak,

¹⁶henteu usik-usik, lir orok udul.

¹⁷Di jero kubur mah, nu jahat eureun ngajahat, nu cape gawe, reureuh tina gawena.

¹⁸Sakitan-sakitan ge di dinya mah ayem-tengtrem, teu nguping anu sesentak reujeung hahaok.

¹⁹Di dinya mah mulya hina sami bae, budak beulian ge bebas merdeka.

²⁰Kanggo naon Si Nalangsa dihirupan? Kanggo naon Si Prihatin dicaangan?

²¹Balik pepeh nunggu paeh, ajalna teu datang-datang. Nu kitu mah sono keneh ka kuburan batan kana pependeman.

²²Nu kitu mah nembe senang mun hos paeh, rup ku padung rap ku lemah, nembe genah.

²³Nu kitu mah hirupna ku Allah dikepung sakurilingna, mangsa pikahareupeunana ku Allah disamunikeun.

²⁴Mungguh abdi boro-boro bisa neda, balas rumahuh, humarurung udah-aduh.

²⁵Nu dipikasieun nampeu, nu dipikahariwang datang.

²⁶Hayang tengtrem teu tiasa, hayang genah teu tiasa, lara teu aya sudana.”