Read Boros Dusun AYUB 31 Bible Online

AYUB 31 - Boros Dusun bible

AYUB 31

¹Kuring geus sumpah, jangji moal pelang-pelong ka mojang bari dilamun.

²Naon nu baris dipidamel ku Allah Nu Maha Kawasa? Baris kumaha ngabalesna kana kalakuan manusa?

³Sial jeung cilaka pasti ku Mantenna didatangkeun ka anu migawe dosa.

⁴Allah pasti uningaeun sagala kalakuan kuring, pasti ningalieun salengkah-lengkah kuring.

⁵Sumpah, kuring can kungsi boga lampah goreng, tara pangangguran tupa-tipu.

⁶Upama seug ku Allah ditimbang sing bener, moal teu kauninga yen kuring putih beresih.

⁷Lamun mengpar ti jalan nu bener, atawa ulad-elod kana kagorengan, lamun ieu leungeun lamokot ku masiat,

⁸daek tumpur pibuateun, atawa kop bahan pangan kuring beakkeun ku deungeun-deungeun.

⁹Lamun kuring mikabogoh pamajikan batur, jejengkean taang-toong di tukangeun pantona,

¹⁰pamajikan kuring mangka mangejokeun lalaki sejen, mangka hees jeung lalaki sejen.

¹¹Lamun enya kuring boga kalakuan nista sarupa kitu dihukum pati ge kajeun.

¹²Kalakuan kitu sasat seuneu ngagegedur, seuneu naraka, nu baris malindes ngabasmi naon bae nu aya di kuring.

¹³Mun badega gegelendeng ka kuring, teu burung didenge, ditimbang kumaha layakna.

¹⁴Sabab lamun henteu kitu, na werat kuring ngadeuheus ka Allah? Kumaha nya pijawabeun lamun ku Mantenna dipariksa?

¹⁵Lantaran boh kuring boh badega, tunggal dadamelan Allah.

¹⁶Lebah kuring, ka nu miskin tara teu nolih, ka randa-randa anu sangsara tara teu mirosea,

¹⁷tara ngantep pahatu anu teu nyatu, paliyas makmak-mekmek sosoranganan.

¹⁸Saumur-umur, tuman nulungan nu kararitu.

¹⁹Lamun nenjo nu walurat henteu boga baju-baju acan,

²⁰sok bae ku kuring mah dibere kaen wol, beunang nyieun tina bulu domba nu sorangan. Atuh mani bebeakan muji-mujina ka kuring.

²¹Lamun kuring kungsi nipu ka nu pahatu, pedah ujub dibawa ka pangadilan ge moal teu meunang,

²²masing pingges ieu leungeun duanana, sing nepi ka sarengkleh ngaraplek.

²³Paliyas boga kalakuan kitu, sieun disiksa ku Allah.

²⁴Kabeungharan teu dijieun pananggeuhan,

²⁵kamuktian teu dipake kaagulan.

²⁶Tara muja ka cahya surya, tara munjung ka bulan purnama.

²⁷Tara pirajeunan muja ka anu karitu ku cara nyium leungeun sorangan ciri yen muja ka nu karitu.

²⁸Dosa nu sarupa kitu, manjing kana hukum pati, sabab mungkir ti Nu Maha Kawasa.

²⁹Mun musuh nandang pakewuh, atawa kagirijig ku balai, haram lamun kuring bungah, paliyas kuring mupuas.

³⁰Komo nepi ka ngamuga-muga sing paeh mah, paralun, dosa, kikituan teh, dosa!

³¹Ka jalma anyar pinanggih tara asa-asa ngaku, gandek-gandek kabeh oge nyarahoeun, tabeat kuring teh kitu.

³²Nu keur nyaba kaburitan lebah imah kuring, geuwat disambat, disimpangkeun, da teu tega ngantep nepi ka hees di emper batur.

³³Batur mah ari boga dosa teh disidem, kuring mah anggur balaka,

³⁴rek pada ngomongkeun kitu ngomongkeun kieu, mangga teh teuing da rumasa, tinimbang bungkem atawa ngaringkeb maneh, dumeh sieun diera-era.

³⁵Naha moal aya nu percaya ka ieu omongan kuring? Wani sumpah, kabeh ge eta teh enya, Allah Nu Maha Kawasa saksina. Lamun eta panuding-panuding lawan ka kuring ditulis, nepi ka katenjo ku panon kuring,

³⁶rek disampaykeun dina taktak reujeung agul, malah rek diterapkeun dina sirah lir makuta.

³⁷Eta sagala kalakuan kuring teh arek diunjukkeun ka Allah, tur ngunjukkeunana ge tangtu tatag sarta ludeung.

³⁸Lamun aya lahan kuring nu beunang ngagasab, beunang papaksa ti nu bogana anu sah,

³⁹atawa ngala ngadahar beunang batur melak, ari nu melakna kalaparan,

⁴⁰sing tibalik, mun jagong sing jadi jarong, mun pare sing jadi eurih.” Sakitu pokpokan Ayub.