Read Boros Dusun AYUB 32 Bible Online

AYUB 32 - Boros Dusun bible

AYUB 32

¹Anu tiluan balem bae teu kersaeun ngawaler, lantaran Ayub ngaraos kacida yakinna yen anjeunna bener.

²Tapi kasauran aranjeunna teh aya anu ngabandungan di dinya, nya eta Elihu putra Barakel, urang Bus ti kaom Ram. Anjeunna panas manahna ka Ayub anu neugtreug tur sakitu suabanana ka Allah.

³Ka sobat-sobat Ayub anu tiluan oge jengkeleun pisan dumeh beunang kapeupeuh ku Ayub, siga pisan dina eta perkara teh memang Allah anu lepat.

⁴Tadi, ku sabab rumaos panganomna, nyabar-nyabar anjeun bae, ngadago seepna kasauran anu geus sarepuh.

⁵Barang anu tiluan tea teu ariasaeun ngawaler, Elihu teu tahan deui,

⁶pok bae misaur, ”Sim kuring rumasa ngora keneh, paralun kumawantun ka nu geus sarepuh, teu wantun milu ngedalkeun kereteg hate.

⁷Ceuk emutan, keun Bapa-bapa bae anu cacarios, kawantu sepuh-sepuh mah tangtos luhung panemuna.

⁸Nanging sanaos kitu, luhung teh kapan ku kersaning Roh Allah Nu Maha Kawasa.

⁹Jalmi jadina pinter atanapi terang kana bebeneran teh sanes ku dumeh kakolotanana.

¹⁰Ku kituna darangukeun, sim kuring seja mihatur.

¹¹Waktos Bapa-bapa sasauran, sim kuring anteng ngabandungan, seja mulungan pituah-pituahna anu marunel.

¹²Dibandungan ti awitna, Bapa-bapa sidik gagal, kawon ku ucap-ucapan Ayub.

¹³Atuh naon tawisna, majar Bapa-bapa parantos seueur elmu panemu teh? Ku sabab Bapa-bapa parantos kawon, tangtos mung Allah nu iasa ngawaler ka Ayub.

¹⁴Memang Ayub sasauranana teh ka Bapa-bapa, lain ka sim kuring. Sim kuring seja mangjawabkeun, tapi moal nganggo jalan mamanahan Bapa-bapa.

¹⁵Ayub! Aranjeunna parantos kawon, teu ariasaeun deui ngawalon.

¹⁶Ningal nu parantos bungkem, naha pantes sim kuring cicing-cicing bae? Aranjeunna kalah ka tingharuleng, seepeun pisaureun.

¹⁷Kari sim kuring anu kedah nyarita, kedah ngajawab, ngedalkeun kereteg hate.

¹⁸Sim kuring geus meh teu kuat, hayang buru-buru kedal, piomongeun parantos teu bisa dipondah.

¹⁹Lamun nepi ka teu bisa dikedalkeun, tangtu mudal bedah sorangan, lir kirbat anu pinuh ku anggur anyar.

²⁰Teu tahan, kudu dibudalkeun.

²¹Tapi teu pisan-pisan rek mihak, moal ngugung ka itu, moal ngugung ka ieu.

²²Ongkoh teu tiasa ngugung-ngugung teh, malah mun nepi ka ngugung-ngugung, muga ulah jamuga ti Allah.