Read Boros Dusun AYUB 33 Bible Online

AYUB 33 - Boros Dusun bible

AYUB 33

¹Salajengna dangukeun ieu pihatur,

²sim kuring sumeja ngedalkeun eusi pikiran,

³anu medal tina ati sanubari, sanes bohong akon-akon.

⁴Roh Allah geus nyiptakeun kuring sarta maparin hirup ka kuring.

⁵Bisi bade ngawaler, ari iasa mah mangga, geura sayagi panakisna.

⁶Diri sim kuring sareng salira Pa Ayub, estu sami menggah di payuneun Allah, sami-sami sipat taneuh sareng lebu.

⁷Jadi Pa Ayub teu kedah risi-risi, da sim kuring mah teu gaduh niat ngelehkeun.

⁸Saur Pa Ayub tadi anu kakuping ku abdi:

⁹ʼKuring teu boga salah. Teu boga kaluluputan, taya dosa naon-naon.

¹⁰Tapi Allah teu kurang-kurang alesan keur nyilakakeun kuring, kuring teh dianggap musuh,

¹¹suku diterapan rante, saincak saparipolah mani haben diawaskeun.ʼ

¹²Ceuk sim kuring mah, Pa Ayub, eta teh lepat! Allah mah agungna ngungkulan umat manusa.

¹³Naha Pa Ayub nuding ka Allah, magar tara malire kana udah-aduhna manusa?

¹⁴Allah teh ngandikana ku rupi-rupi jalan, ngan urangna tara daek nolih kana sagala dawuhana-Na.

¹⁵Ari ngandika-Na, sakapeung dina impian atawa tetenjoan, sajeroning urang mondok.

¹⁶Pangersa-Na sangkan dawuhana-Na teh digugu, sangkan urang sieun kana panggeuing Mantenna,

¹⁷sangkan eureun tina migawe dosa, jeung sangkan ulah ieu aing.

¹⁸Allah mah tara kagungan niat nyilakakeun jalma, malah jalma teh diaping tina ancaman malakalmaot.

¹⁹Osok soteh meperih, maparin pepeling, jalma dipaparin gering, dipaparin kanyeri nu teu puguh rasakeuneunana.

²⁰Keur gering mah tara hayang dahar-dahar acan, kajeun kana pangabeuki weleh henteu hayang bae.

²¹Awak jadi ngajangjawing, tinggal tulang tingtorelak,

²²bari nunggu-nunggu dawuh geusan iang ka alam kubur.

²³Tapi boa teuing aya malaikat Allah ti anu mangrebu-rebu, anu ngelingan ka eta nu gering sangkan inget kana kawajibanana,

²⁴seug misaur bari pinuh ku kawelas, ʼMugi eta jalmi dicageurkeun deui, ulah waka sina asup kana jero kubur, tah ieu kangge panebusna.ʼ

²⁵Seug nu gering teh neutneutan menyat, tanagana pulih deui, bedas deui cara keur ngora.

²⁶Panedana ku Allah didangu, hatena bungah bisa deui muji ka Allah sagala lampahna ku Allah diloyogkeun ka nu bener.

²⁷Seug balaka ka balarea, ʼKuring teh jalma doraka, sagala kalakuan taya nu bener, tapi ku Allah teu weleh ditulung, dicageurkeun.

²⁸Ku sih piwelas-Na kuring teu tulus asup ka kubur, bisa keneh gumelar di alam dunya.ʼ

²⁹Kitu mungguing Allah mah, nulung deui, nulung deui.

³⁰Jalma teh ku Mantenna diraksa hirupna, sina bagja sina jamuga.

³¹Ayeuna, mugi Pa Ayub kersa ngabandungan deui pihatur sim kuring salajengna.

³²Nanging bilih aya saurkeuneun mah saurkeun bae, atuh ari Pa Ayub nu leres, memang kitu utamina.

³³Sawangsulna upami henteu, mangga bandungan, sim kuring sumeja mere pepeling, tina hal kabijaksanaan.