Read Boros Dusun AYUB 34 Bible Online

AYUB 34 - Boros Dusun bible

AYUB 34

¹Bapa-bapa anu sugih ku pangarti, jembar kauninga, darangukeun ieu pihatur sim kuring,

³sangkan tiasa ditimbang-timbang leres henteuna, sapertos kadaharan, disebut ngeunah henteuna teh saparantos diraosan.

⁴Kasauran-kasauran Pa Ayub teh urang puguhkeun leres henteuna.

⁵Anjeunna keukeuh ngaraos teu kagungan kalepatan, nanging ku Allah teu dipaparin kaadilan.

⁶Saurna ge, ʼNa kuring kudu pura-pura ngaku salah sanajan henteu? Diri jadi ruksak kieu, padahal teu boga dosa.ʼ

⁷Saha deui jalmi nu sapertos Pa Ayub, teu aya semu-semuna ngajenan ka Allah?

⁸Bet teu benten ti anu jarahat, sapamolah sami sareng anu masiat.

⁹Nepi ka wantun nyebatkeun, magar taya pisan gunana jelema anut ka Allah teh.

¹⁰Bapa-bapa nu palinter, dangukeun ieu sim kuring Allah Nu Maha Kawasa pamohalan kaliru.

¹¹Jalma diganjar satimpal reujeung gawena, dibalesna numutkeun kumaha lampahna.

¹²Allah Nu Maha Kawasa tara midamel kaawonan, ka sasaha ge tara teu midamel nu satemenna.

¹³Naha Mantenna kengingna kawasa teh ti jelema? Naha Mantenna nyangking jagat teh dijenengkeun ku manusa?

¹⁴Mun Mantenna nyabut deui napas kahirupan,

¹⁵sugri nu kumelip pinasti lastari, mulang kana taneuh asalna.

¹⁶Upami Bapa-bapa bijaksana, dangukeun ieu pihatur sim kuring.

¹⁷Naha leres Allah teh ceuceub kana kaadilan? Naha Bapa-bapa bade ngalepatkeun ka Allah Nu Maha Adil?

¹⁸Allah ngahukum raja-raja sareng nu nyarepeng kawasa, lamun aranjeunna tanpa guna atanapi jarahat.

¹⁹Mantenna moal mihak ka nu nyarepeng kawasa, moal leuwih mentingkeun nu beunghar ti batan nu miskin, da sadayana oge sami ciptaan Mantenna.

²⁰Mun jalma geus dikersakeun, rek janari tengah peuting sakedet netra hos maot. Ana enggeus dikersakeun, jalma ngelepek harita keneh. Nyabut nyawa pangagung oge Allah mah gampileun bae.

²¹Salengkah-lengkah manusa ku Mantenna dititenan.

²²Dosa jalma kajeun di nu poek mongkleng, ku Allah mah katingali nonggerak.

²³Mun Mantenna rek ngahukum, tara mikabutuh waktu.

²⁴Mun Mantenna rek ngarorod pangagung sangkan diganti ku nu sejen, Mantenna mah henteu perlu papariksa deui,

²⁵sabab sagala-galana ku Mantenna geus kauninga. Rek janari tengah peuting, ku Mantenna tangtu ragrag tangtu remuk.

²⁶Sing saha nu jahat tangtu dihukum, kasaksi ku balarea,

²⁷buruh tina wangkelangna ngabaha ka Mantenna, ngamomorekeun timbalana-Na.

²⁸Panyambat jalma malarat nu jumerit ka Mantenna, lantaran disangsara ku nu jarahat, tangtu didangu.

²⁹Mun Mantenna ngersakeun nganggur, moal aya nu bisa ngageureuh-geureuh. Mun Mantenna nyumputan, jalma mo bisa manggihan.

³⁰Bangsa-bangsa mo bisa kumamaha sangkan leupas tina panggencet bangsa nu teu percaya ka Allah.

³¹Pa Ayub, kumaha kersa ngangken dosa ka Allah, kersa jangji moal kitu-kitu deui?

³²Kumaha parantos nyuhunkeun sangkan ku Allah dituduhkeun naon nya kalepatan? Kumaha parantos kapok moal midamel deui kaluluputan?

³³Rupina kahoyong Bapa mah Allah teh kedah tumut kumaha Bapa, pangna teu satuju kana pangersa-Na teh, sanes? Perkawis eta kumaha Bapa, da sanes urusan sim kuring. Cobi sebatkeun, kumaha mamanahan teh?

³⁴Ku emutan, sugri anu ngaruping ieu pihatur, menggah nu sehat pikiran tur berbudi mah tangtos ngahaminan kana pamendak sim kuring,

³⁵yen kasauran Ayub teh kasauran jalma sasar, sasaur-saurna henteu kalawan dipikir.

³⁶Upami kasauran-kasauranana tea diemut-emut deui, baris nyata yen taya bedana ti omongan jalma jahat.

³⁷Dosa-dosana tambah deui sarupi, nya eta ngalawan ka Allah di hareupeun urang anjeunna moyok ka Allah.