Read Boros Dusun AYUB 39 Bible Online

AYUB 39 - Boros Dusun bible

AYUB 39

¹Nyaho maneh kana waktuna embe cadas anakan? Enggeus maneh nyaksian uncal jarah ngajuru?

²Bisa maneh ngitung bulanna nepi ka jejeg waktuna anakan?

³Nyaho maneh keur ngaheujeunna, nepi ka borosot anakna bijil ka alam dunya?

⁴Anakna ngagaledean di pileuweungan, geus galede marisahkeun maneh ninggalkeun indungna.

⁵Ku saha diaburna kalde jarah? Ku saha diumbarna sina ngencar bebas lepas?

⁶Minangka kandangna ku Kami disadiaan gurun keusik, sina ngumbar maneh di daerah nu pangset taneuhna.

⁷Hirupna jauh ti kota-kota, ti nu garandeng, moal aya nu bisa ngadalian bari seug digawekeun.

⁸Nyatuanana di sampalan pagunungan, sakarep-karep milihan dangdaunan nu harejo.

⁹Daekeun banteng mun ku maneh digawekeun, atawa ari ti peuting dikandangan?

¹⁰Bisa ku maneh dikaluhan sina narik wuluku, atawa sina ngagusur garu di sawah?

¹¹Bisa maneh make tanaga rongkahna sina nalangan ngagawekeun anu bareurat?

¹²Dina usum panen, na bisa ku maneh sina ngakutan pare, atawa sina ngumpulkeun gabah ti pangirikan?

¹³Manuk onta kikiplikna mah gancang naker, tapi euweuh manuk onta anu cara bango bisa hiber.

¹⁴Ana ngendog, endogna diantep ngagaloler dina taneuh, sina kahaneutan ku ngelekebna hawa tina taneuh.

¹⁵Teu boga pisan kamelang bisi endogna katincak, atawa kaidek ku sasatoan,

¹⁶kawas lain ka endogna bae, mangsa bodo masing usahana percumah oge.

¹⁷Dihaja ku Kami sina sakitu bodona, teu dibere temah wadi.

¹⁸Tapi ana enggeus lumpat, kuda balap katut jokina ge ku eta diseungseurikeun.

¹⁹Naha beunang maneh, Ayub, nu matak kuda sakitu gagahna? Naha maneh anu ngararangkenan beuheungna ku susuri mani ngerab?

²⁰Na ku maneh pangna eta bisa ngajleng kawas simeut, jeung ana sesegor matak sawan?

²¹Cokorna mani kekeduk nyakaran taneuh, bisa nyemprung muru medan perang, daweung teuneung ulat gagah.

²²Sepi karisi euweuh kasieun, cadu mundur, teu rempan ku congo pedang.

²³Pakarang pahlawan nu tarumpakna tinggalenjreng disarada, tinggurilap katojo sang surya.

²⁴Mun ngadenge teretetna sora tarompet, bangun geus teu betah cicing, awakna ngagidir bangun nguntup hayang geura prung.

²⁵Saban teretet tarompet, seug bebenger, samemeh der perang campuh, hawana geus kaambeueun. Ceulina rancung, resepeun ngadenge sosoakna para panglima paparentah.

²⁶Ari manuk heulang, na ku maneh diwarahna hiber, sina meberkeun jangjangna ana eukeur nyuruwuk ka kidul?

²⁷Kitu deui rajawali, na kudu ngadenge parentah maneh heula, sangkan nyayangna di gunung anu laluhur?

²⁸Kapan nyayangna teh dina sela-sela cadas pangluhurna, lebah penglutna anu lancip tur netek.

²⁹Ti lebah dinya matana gular-giler, ngawas-ngawas neangan mamangsan geusan hakaneun.

³⁰Ana manggih bangke rob dironom, anak-anakna nyarerotan getih.