Read Boros Dusun AYUB 8 Bible Online

AYUB 8 - Boros Dusun bible

AYUB 8

¹”Anggeus meureun ayeuna mah, catur nu sakitu ngagelebugna teh!

³Allah mah hamo nyimpang tina kaadilan, hamo salah ngalarapkeunana.

⁴Nu dorakana ka Allah teh moal salah deui, anak, nya tangtu dihukum, satimpal jeung pamolahna.

⁵Kari anjeun, matak naon lamun tobat, neda ampun ka Allah Nu Maha Kawasa.

⁶Asal bener Ki Sobat jujur beresih, piraku Allah teu kersa mitulung. Rumah tangga Ki Sobat tangtu dipulihkeun deui, minangka ganjaranana.

⁷Harta banda nu geus musna kaitung taya hartina, lamun dibanding jeung nu engke, nu baris dipaparinkeun deui ku Allah.

⁸Coba nyoreang heula ka anu barijaksana baheula, kana benerna pamanggih karuhun urang.

⁹Hirup urang keur mah pondok, turug-turug urangna ge henteu terang naon-naon, urang teh jeg kalangkang dina beungeut taneuh.

¹⁰Tapi tengetkeun ieu piwulang jalma-jalma bijaksana jaman baheula, regepkeun ieu nu rek dikedalkeunana,

¹¹ʼJukut walini piraku jadi, saupama taya cai, da anu kitu mah moal hirup lamun lain di nu ledok.

¹²Ana cai enggeus garing, eta nu pangheulana perang, ngora-ngora keneh ge geus paeh, henteu kaburu diala.

¹³Jalma-jalma anu teu baroga Allah ge kitu, cara jukut walini tea, moal teuing kana menyat deui, dumeh mopohokeun ka Allah.

¹⁴Hirupna teh, lir nu nyukang dina benang, nete kana ramat lancah.

¹⁵Naon kakuatanana ramat, na bisa disarandean? Naon kakuatanana benang, naha beunang dipuntangan?ʼ

¹⁶Hirupna jelema jahat, lir areuy salaleger kasorot ku panonpoe, mani nyayang nyaliara sabudeur kebon,

¹⁷akarna ngaranggeum batu, pageuh nyangkerem kana batu cadas.

¹⁸Tapi lamun geus dicabut, geus hamo kaciri urut-urutna acan.

¹⁹Ngan semet kitu kajayaan jelema jahat mah, terus musna, urutna diandih ku nu lian.

²⁰Allah mah hamo nilarkeun jelema anu satuhu, hamo nulung ka jelema anu jahat.

²¹Ki Sobat ge tangtu ku Mantenna dijungjung deui, bisa seuri deui, bisa surak deui.

²²Balikanan anu ngewa ka Ki Sobat, tinangtu nandang wiwirang. Pangancikan jalma jahat mah tinangtu musna.”