Read Boros Dusun JABUR 118 Bible Online

JABUR 118 - Boros Dusun bible

JABUR 118

¹Puji sukur ka PANGERAN, ku tina kasaeana-Na, ku tina langgeng asih-Na.

²Ucapkeun ku Israil, ”Asih Mantenna langgeng.”

³Ucapkeun ku para imam Allah, ”Asih Mantenna langgeng.”

⁴Ucapkeun ku sakabeh nu ngabakti ka Mantenna, ”Asih Mantenna langgeng.”

⁵Sajeroning rupek, kami sasambat ka PANGERAN, ku Mantenna didangu, kami dibebaskeun.

⁶PANGERAN nyarengan kami, kami taya karisi; rek bisa kumaha jelema ka kami?

⁷Nya PANGERAN anu nulung ka kami, kami bakal nyaksian musuh kami kasoran.

⁸Mending percaya ka PANGERAN, ti batan ngandelkeun manusa.

⁹Mending percaya ka PANGERAN, ti batan ngandelkeun para pamingpin nu sipatna manusa.

¹⁰Loba musuh anu ngepung kami, tapi ku kawasa PANGERAN, kabeh ku kami dibasmi.

¹¹Maranehna ngepung kami ti mana-mana, tapi ku kawasa PANGERAN, kabeh ku kami dibasmi.

¹²Maranehna napuk ka kami kawas nyiruan, tapi lir seuneu ngahuru ruyuk gancang pareumna, ku kawasa PANGERAN, kabeh ku kami dibasmi.

¹³Kami ditarajang hebat pisan, geus meh eleh, tapi PANGERAN nulungan,

¹⁴ku PANGERAN dibere tanaga jadi kuat; Mantenna geus nyalametkeun kami.

¹⁵Reungeukeun surak nu unggul di kemah-kemah umat Allah: ”Karongkahan PANGERAN nu midamel kitu!

¹⁶Ku kakawasaan Mantenna urang unggul — ku karongkahan Mantenna di medan perang!”

¹⁷Kami moal paeh, sabalikna malah hirup, pikeun ngembarkeun padamelan-padamelan PANGERAN.

¹⁸PANGERAN geus ngahukum kami beurat pisan, tapi Mantenna henteu ngantep kami sina paeh.

¹⁹Kami pangmukakeun lawang gapura Bait Allah, rek asup, rek muji sukur ka PANGERAN!

²⁰Tah ieu lawang gapura PANGERAN, ngan jalma nu jujur nu bisa asup.

²¹Abdi muji ka Gusti, parantos ngadangu paneda abdi, sareng parantos maparin kaunggulan.

²²Batu nu teu kapake ku nu ngawangun, malah jadi anu pangpentingna.

²³Jadi kitu teh ku PANGERAN, katembongna matak helok.

²⁴Ieu teh poe kaunggulan PANGERAN, hayu urang suka bungah, urang pestakeun!

²⁵Salametkeun abdi sadaya, nun PANGERAN! Paparinan abdi-abdi kaunggulan, nun PANGERAN!

²⁶Mugia Allah ngaberkahan ka nu datang kalayan pajenengan PANGERAN, kaula sakumna ngaberkahan ti Bait PANGERAN.

²⁷PANGERAN teh Allah; Mantenna geus midamel kasaean ka urang. Bari nyarekel rangrang dangdaunan, pesta geura mimitian, tuluy maju ngurilingan altar.

²⁸Gusti teh Allah abdi. Abdi muji sukur ka Gusti. Abdi bade ngabewarakeun kaagungan Gusti.

²⁹Haturkeun nuhun ka PANGERAN, Mantenna sae ka urang, asih-Na langgeng.