Read Boros Dusun JABUR 145 Bible Online

JABUR 145 - Boros Dusun bible

JABUR 145

¹Pamuji ti Daud. Nun Allah, nun Raja, abdi bade ngembarkeun kaagungan Gusti, sareng bade muji sukur sapapaosna.

²Unggal-unggal dinten bade muji sukur, bade ngamulyakeun Gusti sapapaosna.

³Agung PANGERAN teh, pohara pinujina, kaagungana-Na henteu katepi ku pangarti.

⁴Sugri padamelan Gusti bakal diagung-agung ku unggal turunan, dadamelan Gusti anu rarongkah bakal dimashurkeun ku maranehna.

⁵Maranehna bakal nyaritakeun kamulyaan sareng kadaulatan Gusti, sarta abdi bade ngalenyepan dadamelan Gusti anu araheng.

⁶Jalmi-jalmi bakal nyaritakeun sugri dadamelan Gusti anu rarongkah, abdi oge sumeja ngembarkeun kaagungan Gusti.

⁷Jalmi-jalmi bakal nyaritakeun kasaean Gusti, sareng nganyanyikeun kaadilan Gusti.

⁸PANGERAN teh sipat welas sipat hampura, tara gancang bendu, sarta jembar asih.

⁹Mantenna sae ka unggal jalma, sarta mikawelas ka saniskara dadamelana-Na.

¹⁰Sadaya mahluk Gusti bakal ngamulyakeun, nun PANGERAN, sarta umat Gusti bakal maruji sukur ka Gusti,

¹¹maranehna bakal nyaritakeun kamulyaan karajaan Gusti, sareng nyaritakeun karongkahan Gusti,

¹²dugi tiap jalmi terang kana dadamelan Gusti nu rarongkah, sareng kana kamulyaan kadaulatan karajaan Gusti.

¹³Pamarentahan Gusti langgeng Gusti jadi raja sapapaosna. PANGERAN satia kana saniskara jangji-Na, tur mikawelas ka saniskara dadamelana-Na.

¹⁴PANGERAN nulungan sakur anu kasusahan, sarta ngahudangkeun anu lalabuh.

¹⁵Sakumna mahluk hirup ngarep-ngarep ka Gusti, sarta dina waktosna ku Gusti dipaparin tedaeun;

¹⁶Gusti maparin sacekapna, sareng nyumponan kabutuh sakumna mahluk.

¹⁷PANGERAN adil dina sagala tindakana-Na dina sagala damelna dibarengan ku kawelasan.

¹⁸Mantenna deukeut ka sakur anu sasambat ka anu sasambatna ka Mantenna enya-enya.

¹⁹Mantenna nyumponan kabutuh jalma anu ngahormat, kersa ngadangu sarta nyalametkeun sakur nu jumerit ka Mantenna.

²⁰Mantenna ngaraksa ka sakur nu micinta salira-Na, sabalikna nu jahat mah ku Mantenna dibasmi.

²¹Kaula moal kendat muji ngagungkeun PANGERAN, sing sakur nu kumelip masing ngamulyakeun kana jenengana-Na nu suci, sapapanjangna.