Read Boros Dusun JABUR 30 Bible Online

JABUR 30 - Boros Dusun bible

JABUR 30

¹Jabur Daud. Lagu ngaresmikeun Bait Allah.

²Abdi muji, nun PANGERAN, reh Gusti parantos nyalametkeun abdi, diluputkeun tina perongan musuh.

³Abdi nyambat pitulung Gusti, nun PANGERAN Allah abdi, teras ku Gusti diwaluyakeun,

⁴diluputkeun ti jero kubur. Waktos abdi nyoloyong ka nu nyublek jero, nyawa abdi ku Gusti dipulihkeun.

⁵Puji PANGERAN ku nyanyian, he umat-Na nu saratia! Aringetkeun padamelan Nu Maha Suci, urang kudu nganuhunkeun ka Mantenna.

⁶Benduna PANGERAN ka urang ngan sakeudeung, tapi kasaeana-Na mah saumur-umur. Reup peuting bijil cipanon, bray beurang datang kabungah.

⁷Kaula ngarasa senang, seug ngomong sorangan, ”Aing moal eleh.”

⁸Gusti parantos nulung ka abdi, nun PANGERAN, ngajagi ka abdi lir benteng di luhur gunung. Nanging salajengna Gusti nyumput ti abdi, abdi kacida tagiwurna.

⁹Abdi nyambat ka Gusti nyuhunkeun ditulungan:

¹⁰”Naon untungna ka Gusti upami abdi paeh? Naon mangpaʼatna upami abdi parantos dikubur? Barisaeun anu maraot maruji ka Gusti? Barisaeun ngembarkeun kasatiaan Gusti?

¹¹Sing hawatos, dangukeun abdi nun PANGERAN! Tulungan abdi, nun Gusti!”

¹²Kaprihatinan abdi ku Gusti parantos digentos ku kasukaan, kasedih parantos leungit, ayeuna kantun sukana.

¹³Kitu margina abdi moal cicing, tapi bade nyanyi muji ka Gusti. Nun PANGERAN, Gusti teh Allah abdi, abdi muji sukur ka Gusti salalamina.