Read Boros Dusun JABUR 36 Bible Online

JABUR 36 - Boros Dusun bible

JABUR 36

¹Pikeun pamingpin biduan. Ti Daud abdi PANGERAN.

²Dosa teh ngomong di jero hate jelema jahat. Hate jelema doraka teu weleh kaangsonan ku dosa, ka Allah teu sieun-sieun, Allah ku manehna ditoker.

³Pangrasana dirina teh hebat, pamikirna dosana moal dihukum ku Allah, da Allah teu uningaeun.

⁴Saucap-ucapna jahat, tipu malulu, tara pisan nyieun lampah hade jeung bijaksana.

⁵Di enggon, bari ngedeng teh ngalamun kajahatan boro-boro nyieun kahadean, ngagugulukeun bae kadorakaan.

⁶Nun PANGERAN, satia asih Gusti sundul ka langit, kasatiaan Gusti maratan mega.

⁷Kaadilan Gusti lir gunung tanpa tutugan, adilna lir jerona jaladri. Manusa sareng margasatwa, ku Gusti diraksa diriksa.

⁸Satia asih Gusti mulya luhur, nun Allah! Kalangkang jangjang Gusti, ngiuhan abdi sadaya.

⁹Abdi-abdi sugema ku seueurna tedaeun ti Gusti, sareng dipasihan nginum ti walungan asihing Gusti.

¹⁰Gusti teh sumbering hirup sadaya mahluk, ku terangna cahaya Gusti, abdi bisa ningal caang.

¹¹Mugi langgeng mikaasih ka sakur nu terang ka Gusti langgeng midamel kasaean ka jalmi anu balener.

¹²Nu aradigung teh sina ulah narajang ka abdi, eta nu jarahat teh ulah diantep ngusir abdi.

¹³Tuh, nu jarahat teh geus tinggolepak, tingjaloprak moal harudang deui.