Read Boros Dusun JABUR 39 Bible Online

JABUR 39 - Boros Dusun bible

JABUR 39

¹Pikeun pamingpin biduan. Pikeun Yedutun. Jabur Daud.

²Ceuk pikiran, ”Aing arek ati-ati ngajaga lampah, jeung ngajaga letah sangkan ulah matak dosa, salila nu jarahat teh dareukeut, aing moal ngomong naon-naon.”

³Tuluy kaula bungkem, teu kecet-kecet, teu ngomongkeun nu hade-hade acan! Tapi bet asa tambah kasiksa,

⁴jadi kakungkung ku rasa tagiwur. Beuki dipikiran, hate beuki susah, tungtungna sungut teh bedah,

⁵”Nun PANGERAN, sakumaha deui hirup abdi teh? Iraha abdi kedah maot teh? Wartoskeun, kantun sakumaha deui umur abdi teh?”

⁶Ku pondok Gusti nangtoskeun umur abdi teh! Keur Gusti mah jangka hirup abdi taya hartosna. Tetela hirup manusa mah mung sarenghap ambekan,

⁷teu leuwih ti kalangkang. Pagaweanana kabeh mubadir, ngumpulkeun kakayaan, tapi teu terang engke keur saha.

⁸Naon deui atuh arep-arepeun abdi, nun PANGERAN? Nya ka Gusti abdi ngaharep.

⁹Luputkeun abdi tina sadaya dosa, sareng ulah diantep dilelece ku nu garejul.

¹⁰Abdi rek ngabisu, moal kecet-kecet, da Gusti ku anjeun nu nyangsara kieu ka abdi teh.

¹¹Parantos atuh ngahukum teh! Abdi meh paeh ku panyiksa Gusti.

¹²Ku karana dosana, jalmi ku Gusti dihukum, dihajar. Gusti ngahukum lir geget ngaruksak barang kanyaah anu gaduhna. Tetela hirup manusa mung sarenghap ambekan.

¹³Dangu paneda abdi, nun PANGERAN, dangu jerit abdi, ari abdi ceurik teh sumpingan. Sami sareng sadaya karuhun, abdi oge numpang di Gusti mung sakedap.

¹⁴Parantos, abdi kantunkeun, hoyong rada senang heula memeh teu aya sareng moal aya-aya deui.