Read Boros Dusun JABUR 41 Bible Online

JABUR 41 - Boros Dusun bible

JABUR 41

¹Pikeun pamingpin biduan. Jabur Daud.

²Bagja jalma nu sok tatalang ka nu walurat, mun meunang papait tangtu ku PANGERAN dijait.

³Hirupna ku PANGERAN diraksa, diriksa, tengtrem matuh di tanahna, moal diantep beunang ku musuhna,

⁴Ana gering, ku PANGERAN tangtu dilayad, dipulihkeun deui kasehatanana.

⁵Ceuk kaula, ”Nun PANGERAN, abdi teh rumaos dosa, nyuhunkeun piwelas, hoyong cageur.”

⁶Musuh rame ngawon-ngawonkeun abdi, ngadoakeun maot, ngadoakeun sing tereh kapopohokeun.

⁷Rajeun ngaralayad mung dapon bae, sareng ngumpulkeun wartos-wartos awon hal abdi, seug diuar-uar ka mana-mana.

⁸Anu ngarewaeun teh tingharewos, ngira-ngirakeun hal anu pang awonna hal abdi.

⁹Aromongna, ”Geringna ripuh pisan, geus moal hudang deui ti enggon.”

¹⁰Malah sobat dalit ge, sobat sarasiah, sobat sahakan sainum, malik miceun.

¹¹Nun PANGERAN, sing hawatos, abdi cageurkeun, hoyong mulangkeun kanyeri ka musuh.

¹²Upami maranehna teu barisaeun ngelehkeun abdi, nembe abdi bakal leres-leres terang yen Gusti nyaah ka abdi.

¹³Gusti tangtos nulungan, da kalakuan abdi teh bener; Gusti tangtos nampi abdi hirup di payuneun, salalamina.

¹⁴Puji PANGERAN, Allahna Israil! Ayeuna, terus salalanggengna! Amin! Amin!