Read Boros Dusun JABUR 44 Bible Online

JABUR 44 - Boros Dusun bible

JABUR 44

¹Pikeun pamingpin biduan. Jabur golongan Korah. Lagu atikan.

²Nun Allah, abdi-abdi nguping pribadi perkawis eta, anu dicariosan ku karuhun; hal karya-karya Gusti anu rongkah jaman aranjeunna, jaman baheula.

³Kumaha peta Gusti ngusiran bangsa-bangsa tuna Allah, sareng merenahkeun umat Gusti di nagri-nagri maranehna; kumaha peta Gusti ngahukum bangsa-bangsa sanes sareng ngajembarkeun umat Gusti.

⁴Karuhun abdi-abdi tiasa ngarebut tanah musuh, sanes ku pedangna sorangan. Unggulna sanes ku kakuatan sorangan, nanging ku kakawasaan sareng kadigjayaan Gusti, ku margi Gusti nyarengan ka aranjeunna, tawis yen Gusti asih ka aranjeunna.

⁵Gusti teh raja abdi sareng Allah abdi, nu maparin kaunggulan ka umat Gusti.

⁶Ku kakawasaan Gusti abdi tiasa ngarubuhkeun musuh, ku margi disarengan ku Gusti abdi-abdi tiasa ngidek-ngidek lawan.

⁷Pikeun nyalametkeun diri abdi teu ngandelkeun gondewa sareng pedang sorangan;

⁸nya Gusti nu ngajait abdi-abdi ti musuh, anu ngelehkeun pihak anu arijideun ka abdi-abdi.

⁹Abdi sadaya moal petot-petot muji sareng ngucap sukur ka Gusti sapapaosna.

¹⁰Nanging ayeuna abdi-abdi dipiceun, disina eleh, Gusti henteu kersa nyarengan deui ka wadyabalad,

¹¹dugi ka abdi-abdi undur kabur ti musuh, babandaan dicokotan ku maranehna.

¹²Abdi-abdi ku Gusti diantep sina dijagal sapertos domba, disina paburencay ka nagara deungeun.

¹³Umat ku anjeun ku Gusti dijual murah, sapertos barang kurang pangaji.

¹⁴Tatangga anu naringal abdi-abdi ku Gusti didamel kitu; maroyok sareng nyaleungseurikeun.

¹⁵Abdi-abdi ku Gusti didamel bahan gogonjakan bangsa-bangsa, maranehna garogodeg ngahina.

¹⁶Unggal-unggal dinten abdi dihina; kacida erana

¹⁷nguping pamoyok sareng panghina ti nu ngamusuh sareng mikangewa.

¹⁸Ieu sadayana anu karandapan ku abdi-abdi, padahal abdi-abdi teu hilap ka Gusti, sareng teu ingkar tina perjangjian antawis Gusti sareng abdi-abdi.

¹⁹Abdi-abdi teu kantos hianat ka Gusti, teu kantos mengpar tina timbalan Gusti.

²⁰Nanging abdi-abdi ku Gusti dikantun teu aya daya di tengah sato-sato galak, dikantun di nu poek mongkleng.

²¹Upami leres abdi-abdi henteu nyembah deui ka Allah pribadi nanging ngadoa ka nu sanesna,

²²tangtos ku Gusti kauninga, da Gusti mah awas kana pikiran abdi-abdi najan buni.

²³Nya ku karana Gusti, abdi-abdi kaancam pati saban-saban wanci, dipidamel sapertos domba peunciteun.

²⁴Nun PANGERAN, enggal tanghi! Ku naon kulem? Enggal sumping, ulah tega kateterasan!

²⁵Ku naon nyumput ti abdi sadaya? Ulah lali kana kabalangsakan sareng karupek abdi-abdi!

²⁶Abdi-abdi ambrug ajur dina taneuh, kasoran ngajaloprak dina lebu.

²⁷Enggal sumping, tulungan abdi sadaya, salametkeun, demi satia asih Gusti.