Read Boros Dusun JABUR 49 Bible Online

JABUR 49 - Boros Dusun bible

JABUR 49

¹Pikeun pamingpin biduan. Jabur golongan Korah.

²He jalma-jalma, reungeukeun, he saeusi dunya, regepkeun,

³nu hina, nu mulya, nu beunghar, nu miskin, kum.

⁴Kaula dek medar ciptaning ati, ucap hikmah bijaksana.

⁵Kaula rek museurkeun pikiran kana sasmita, sarta nerangkeun hartina bari ngacapi.

⁶Kaula teu rempan ku bahaya, moal bingung pedah dilingkung ku musuh,

⁷teu salempang ku nu jarahat, anu ngandelkeun kabeungharanana, anu takabur ku kajegudanana.

⁸Jalma moal aya nu mampuh nebus nyawana, moal mampuh mayar panebus hirupna ka Allah,

⁹lantaran pamayar hirup manusa teh kacida luhurna. Mayar sakumaha gedena ge

¹⁰moal cukup pikeun luput tina kubur, sangkan hirup sapapanjangna.

¹¹Sabab geus teu matak bireuk, jalma bijaksana ge sarua jeung nu bodo jeung nu biko, hilang ti dunya ninggalkeun hartana ka turunanana.

¹²Kuburanana teh enggonna salalanggengna; di dinya ngancikna sapapanjangna najan keur hirupna mah bogaeun tanah sorangan.

¹³Sakumaha mulyana jalma, moal sumingkir tina patina, kudu paeh, teu beda ti sato.

¹⁴Pek awaskeun, kumaha jadina jalma-jalma anu arumangkeuh ku dirina, kumaha jadina nasib jalma anu umangkeuh ku kabeungharanana.

¹⁵Geus ditakdirkeun kudu maot, teu beda ti domba, bakal diangon ku ajal. Maranehna eleh ku anu hirupna bener, mayit-mayitna gancang buruk di alam paeh, jauh ti imah urut matuhna.

¹⁶Ari kaula mah ku Allah baris dijait, baris diluputkeun tina kakawasaan ajal.

¹⁷Ulah kaget nenjo batur jadi beunghar, masing batur beuki tambah beunghar oge.

¹⁸Da ari geus paeh mah hartana moal kabawa, kabeungharana moal nuturkeun ka jero kubur.

¹⁹Sanajan keur hirupna sugema, sarta pada muji-muji pinter usaha,

²⁰pasti nyusul ajal karuhunna, di nu poek saendeng-endeng.

²¹Sakumaha mulyana jalma, moal sumingkir tina patina, kudu paeh, teu beda ti sato.