Read Boros Dusun JABUR 50 Bible Online

JABUR 50 - Boros Dusun bible

JABUR 50

¹Jabur Asap. Allah Nu Maha Kawasa, PANGERAN, ngandika, nyaur sakuliah jagat ti wetan nepi ka kulon.

²Allah moncorong ti Sion, kota ratuning kaendahan.

³Allah urang sumping. Sumpingna henteu jempling, di payuneuna-Na aya seuneu luntab-lentab, sakuriling Mantenna ngagelebug angin ribut.

⁴Mantenna nyaur langit jeung bumi sina jadi saksi, nyaksian Mantenna nerapkeun hukum ka umat-Na.

⁵Timbalana-Na, ”Kumpulkeun ka dieu umat Kami nu satia, anu kabeungkeut ku perjangjian Kami anu dikukuhkeun ku kurban peuncitan.”

⁶Langit ngabewarakeun yen Allah teh adil, sarta Mantenna ku anjeun nu jadi hakimna.

⁷”Regepkeun he umat, dengekeun pangandika Kami, Kami rek nganyatakeun ka maneh, he Israil: Ieu Kami Allah, Allah maneh.

⁸Kami nyeukseukan ka maneh lain ku karana kurban-kurban maneh, lain ku karana kurban-kurban beuleuman anu salawasna dibaktikeun ka Kami.

⁹Kami teu butuh ku sapi ti kandang maneh, teu butuh ku embe maneh.

¹⁰Kabeh marga satwa di leuweung boga Kami, kitu deui ingon-ingon di rebuan pasir-pasir.

¹¹Manuk-manuk nu gariras boga Kami, kitu deui mahluk-mahluk anu harirup di tegal-tegal.

¹²Upama Kami lapar, moal menta dahareun ka maneh, sabab alam katut saeusina, nya Kami anu bogana.

¹³Na Kami teh dahar daging sapi jalu, atawa nginum getih embe?

¹⁴Baktikeun katumarimaan maneh, kitu kurban ka Allah mah, jeung tedunan jangji maneh ka Nu Maha Kawasa.

¹⁵Upama meunang rerepit, sambat Kami, tan wande dijait sangkan maneh muji sukur ka Kami.”

¹⁶Ari ka nu jahat, kieu Allah ngadawuhna, ”Naon gawena maneh ngucapkeun parentah-parentah Kami? Naon gawena nyaritakeun perjangjian Kami?

¹⁷Da maneh teh embung dibebener ku Kami, parentah-parentah Kami ku maneh dipungpang.

¹⁸Teu cara mun nenjo bangsat, tuluy nyobat, sarta cacampuran jeung nu sok jinah.

¹⁹Sungut diumbar kana kagorengan, ngomong bohong tara asa-asa.

²⁰Ka dulur sorangan tega ngadakwa, tega nyaliksik kasalahanana.

²¹Kitu kalakuan maneh teh, tapi Kami teu ngomong naon-naon, jadi ceuk pamikir maneh Kami oge kawas maneh. Tapi ayeuna maneh ku Kami ditegor, kalakuan maneh kitu ayeuna ku Kami dieceskeun.

²²Ayeuna dengekeun, he anu ngalalaworakeun ka Kami, bisi maneh ku Kami dibasmi, pamohalan aya anu bisa nulungan.

²³Kurban tanda ngahormat ka Kami teh nya eta ku ngucap sukur ka Kami, sarta sakur anu nurut ka Kami geus tangtu ku Kami disalametkeun.”