Read Boros Dusun JABUR 55 Bible Online

JABUR 55 - Boros Dusun bible

JABUR 55

¹Pikeun pamingpin biduan. Dipirig ku kacapi. Lagu atikan karangan Daud.

²Nun Allah, dangukeun paneda abdi, panyambat abdi ulah dipungkuran.

³Mugi perhatoskeun, paparin waleran, abdi teu kiat deui nandang kabingung.

⁴Abdi gugup ku ancaman musuh, sieun ku panggencetna anu jarahat. Sakitu nyaresahkeunana ka abdi, arijideun, arambekeun.

⁵Abdi teh sieun, gigis gimir ku ancaman ajal.

⁶Abdi dugi ka ngeleper ngadegdeg, sieun taya papadana.

⁷Dugi ka hayang jangjangan sapertos japati, bade hiber neangan tempat nu aman.

⁸Bade hiber masing tebih, teras cicing di gurun keusik.

⁹Moal talangke deui neangan tempat nyalindung, nyingkiran topan jeung hujan angin.

¹⁰Nun PANGERAN, pasaliakeun paguneman musuh-musuh abdi. Di kota katingal aya rurusuh sareng kakerasan,

¹¹siang wengi ngurilingan kota. Kota pinuh ku kajahatan jeung kasusahan.

¹²Di mana-mana ruksak, jalan-jalan pinuh ku tukang ngagencet jeung tukang nipu.

¹³Saleuheung lamun anu ngahina teh musuh, kaula kuat nangankeun saleuheung lamun anu nyombong ka kaula teh lawan, kaula bisa nyingkir, nyumput ti manehna.

¹⁴Ieu mah nu kitu teh anjeun pisan, batur sorangan, batur rerentetan, sobat dalit;

¹⁵batur nyarita nu geus kacida lomana, anu tuman babarengan ngabakti di Bait PANGERAN.

¹⁶Muga-muga musuh-musuh teh paraeh ngadadak, sing dikubur hirup-hirup, sabab di imahna jeung dina hatena ngukut kajahatan.

¹⁷Ari kaula mah nyambat ka Allah, tangtu ku PANGERAN dijait.

¹⁸Isuk-isuk, sore, peuting, panyambat jeung rumahuh kaula hanjat ka Mantenna soara kaula tangtu didangukeun.

¹⁹Kaula tangtu disalametkeun ti musuh anu narajang, anu ngambreg sakitu lobana.

²⁰Allah anu nyepeng parentah ti jaman langgeng, baris nulungan kaula ngelehkeun musuh, sabab maranehna arembungeun tobat jeung teu sarieuneun ku Mantenna.

²¹Eta nu tadina batur kaula teh malik nyerang babaturanana, ingkar tina jangji-jangjina.

²²Ucap-ucapanana memang sareh, tapi hatena pinuh ku kangewa; omonganana laleucir ibarat minyak, tapi seukeut matak raheut kawas pedang.

²³Pasrahkeun kasusah maneh ka Allah, Mantenna tangtu ngaraksa; Mantenna moal ngantep jelema bener eleh.

²⁴Nanging nun Allah, memeh eta nu sok maraehan sareng naripu nepi ka tengah umurna, ku Gusti bakal digebruskeun ka jero kuburanana. Dupi abdi mah percaya ka Gusti.