Read Boros Dusun JABUR 56 Bible Online

JABUR 56 - Boros Dusun bible

JABUR 56

¹Pikeun pamingpin biduan. Nurutkeun lagu: Japati bisu di nu jauh. Jabur Daud, waktu anjeunna ditangkep ku urang Pelisti di Gat.

²Sing hawatos ka abdi, nun Allah, ieu abdi ditarajang, teras-terasan bae digencet ku musuh.

³Nu merangan sakitu seueurna, sadinten jeput haben bae ngabereg.

⁴Waktos geumpeur kieu, nun PANGERAN Nu Maha Kawasa, abdi ngaharep ka Gusti.

⁵Kaula teu sieun, sabab percaya ka Allah. Kaula muji ka Mantenna ku tina jangji-Na. Rek bisa naon manusa ka kaula?

⁶Sadinten jeput hayoh bae musuh teh ngarah, teu eureun-eureun ihtiar nyilakakeun abdi!

⁷Maranehna ngumpul di nu buni, ngintip kalakuan abdi, harayangeun maehan.

⁸Hukum eta jelema-jelema jahat teh, nun Allah. Tumpurkeun, hudangkeun amarah Gusti!

⁹Gusti uninga kumaha susahna abdi teh. Gusti uninga jumblah keclak cipanon abdi. Sanes parantos dicatet dina kitab Gusti?

¹⁰Dina dintenan abdi nyambat ka Gusti, musuh abdi pasti undur. Kaula yakin yen Allah aya di pihak kaula,

¹¹nya eta PANGERAN, anu jangji-Na ku kaula dipuji-puji.

¹²Kaula teu sieun, sabab percaya ka Mantenna. Rek bisa kumaha manusa ka kaula?

¹³Nun Allah, abdi nyumponan jangji, nya eta nyanggakeun kurban panarima ka Gusti.

¹⁴Wireh Gusti parantos ngajait abdi tina ajal, sareng teu kantos eleh ku musuh, dugi ka abdi tiasa keneh lumantung di payuneun Gusti, dina cahaya nu nyaangan ka nu harirup.