Read Boros Dusun JABUR 69 Bible Online

JABUR 69 - Boros Dusun bible

JABUR 69

¹Pikeun pamingpin biduan, nurutkeun lagu Kembang Bakung. Ti Daud.

²Nun Allah, salametkeun abdi, cai parantos semet beuheung abdi,

³abdi parantos meh tilelep dina leutak, teu aya tincakeun anu teuas. Abdi tikerelep ka cai jero, ngaleong kabantun ombak.

⁴Ngoceak taya pedahna, tikoro kantun peuyeuhna, panon cape ngalieukan pitulung Gusti.

⁵Anu ngarewaeun ka abdi teu puguh-puguh seueurna alah batan buuk dina sirah. Maranehna ngomongkeun anu teu bener perkawis abdi. Maranehna kuat, sareng ngarah maehan abdi. Abdi ku maranehna dipaksa kedah mulangkeun barang anu sanes kenging maling.

⁶Nun Allah, Gusti tingali kana kabodoan abdi, kalepatan abdi di payuneun Gusti teu aya nu buni.

⁷Nun PANGERAN Nu Maha Agung sareng Nu Maha Kawasa, mugi anu maruntang ka Gusti, ulah dugi ka kaisinan tina lantaran abdi; mugi abdi ulah jadi matak aeb ka jalmi-jalmi anu nyaluuh ka Gusti, nun Allah Israil!

⁸Da pang abdi pada ngahina teh ku karana Gusti. Ku karana Gusti abdi nandang kahinaan.

⁹Ku baraya dijieun deungeun, ku dulur saindung teu diwawuhan.

¹⁰Kacintaan abdi ka Bait Gusti lir seuneu ngarerab hate; pamoyok anu dibaledogkeun ka Gusti, keunana ka abdi.

¹¹Abdi puasa ngasorkeun maneh anggur pada ngahinakeun.

¹²Dangdan ku pakean kasungkawaan, anggur pada nyeungseurikeun.

¹³Di jalan-jalan abdi teh pada ngobrolkeun, ku pamabokan dipake ceuceuleuweungan.

¹⁴Nanging abdi gaduh paneda ka Gusti, nun PANGERAN, mugi diwaler ari parantos waktosna. Mugi dimakbul, demi rosana kanyaah Gusti, demi kasatiaan jangji Gusti yen bade nyalametkeun.

¹⁵Jait abdi, ulah dugi ka tilelep dina ieu embel, luputkeun ti musuh-musuh, hanjatkeun ti jero leuwi.

¹⁶Ulah dugi ka abdi kagulung ku caah, atanapi kaceot ka jero leuwi, atanapi tilelep ka jero kubur.

¹⁷Waler, nun PANGERAN, margi Gusti teh lautan asih, reh Gusti teh sipat welas.

¹⁸Ulah nyumput ti abdi Gusti. Abdi sakieu cilakana, mugi Gusti enggal ngawaler!

¹⁹Enggal geura sumping nyalametkeun, luputkeun abdi ti musuh-musuh.

²⁰Gusti uninga kumaha abdi dihinana, pada moyok, pada nganistakeun; musuh-musuh abdi ku Gusti kauninga.

²¹Pamoyokna ngagerihan kana hate, matak pegat harepan; ngarep-ngarep aya nu ngaraskeun, luput, ngarep-ngarep panglipur, lebeng.

²²Ana lapar anggur disodoran racun, ana halabhab anggur diasongan cuka.

²³Muga-muga perjamuan maranehna sing jadi mamala, hahajatanana sing nyilakakeun dirina.

²⁴Lolong-lolongkeun panonna, leuleus-leuleuskeun tonggongna!

²⁵Tumplekkeun amarah Gusti, tamplokkeun kajengkel Gusti ka maranehna.

²⁶Padumukanana sina saruwung, kemah-kemahna sina parongpong.

²⁷Margi maranehna nganiaya jalma anu ku Gusti disiksa, nganyenyeri ka nu ku Gusti dirangket.

²⁸Catet sadaya kajahatanana, ulah dipaparin salamet.

²⁹Ngaran-ngaranna pareuman tina kitab nu harirup, ulah didaptarkeun dina daptar umat Gusti.

³⁰Nanging abdi teh keur nyeri, seep harepan, angkat abdi teh, nun Allah, salametkeun!

³¹Kaula rek muji ka Allah ku hiji lagu ngamulyakeun Mantenna ku ngucap sukur.

³²Eta bakal leuwih kamanah ku PANGERAN ti batan ngurbankeun sapi, ti batan ngurbankeun sapi jalu nu geus gede.

³³Ana hal eta katangen ku nu balangsak, tangtu barungaheun, sakur nu ibadah ka Allah tangtu hatena reugreug.

³⁴Karana PANGERAN tangtu ngamakbul ka nu walurat, tur moal tega ka umat-Na di jero panjara.

³⁵Puji Allah, he langit jeung bumi, lautan katut mahluk-mahluk laut!

³⁶Mantenna tangtu ngarahayukeun Yerusalem, ngadegkeun deui kota-kota tanah Yuda, sangkan dicicingan ku umat-Na sarta jadi milikna,

³⁷bakal jadi warisan turunan abdi-abdi Mantenna, sarta jadi pamatuhan sakur nu nyaah ka Allah.