Read Boros Dusun JABUR 78 Bible Online

JABUR 78 - Boros Dusun bible

JABUR 78

¹Lagu atikan ti Asap. Bandungan, he umat, regepkeun ieu piwuruk, regepkeun ieu pepeling kami.

²Kami rek ngucapkeun siloka, ngaguar rasiah alam baheula,

³hal-hal anu urang geus ngadenge, geus nyaho tina carita karuhun urang.

⁴Ka anak incu nu ayeuna, mo aya nu dikilungan, nya kitu deui ka turunan anu engke, kumaha mashurna PANGERAN, dadamelana-Na, pangawasa-Na, jeung mujijat-mujijat-Na, anu geus dipidamel ku Mantenna.

⁵Mantenna ka Israil geus maparin hukum, ka turunan Yakub maparin papakon. Mantenna nimbalan ka karuhun urang, yen ieu hukum kudu diajarkeun ka anak-anakna;

⁶malar turunan ieu ngajarkeun ka anu pandeuri, sarta ku ieu ge kudu diajarkeun ka anak-anakna.

⁷Ku jalan kieu maranehna ge bakal nanjeurkeun harepan ka Allah, jeung moal paroho kana sagala pitulung-Na, sabalikna bakal taʼat kana parentah Mantenna, salilana,

⁸ulah cara karuhun-karuhunna, resep ngalawan, basangkal, henteu pangger pangandelna ka Allah, teu ceehan satiana ka Mantenna.

⁹Urang Epraim, sakitu marawa gondewa jeung jamparing, ari der perang mah jicir.

¹⁰Maranehna henteu tigin kana jangjina ka Allah, teu narurut kana hukum Mantenna,

¹¹sarta mopohokeun damel katut mujijat-mujijat, nu ku Mantenna geus dipintonkeun.

¹²Karuhunna ku Mantenna ditembongan mujijat-mujijat, di dataran Soan wewengkon Mesir.

¹³Laut ku Mantenna dibeulah, maranehna dipeuntaskeun, nincak laut anu caina jadi ngadingding kawas tembok.

¹⁴Ti beurang dituyun ku mega, ti peuting ku gebrayna cahaya tina hiji tihang seuneu.

¹⁵Batu-batu cadas di gurun keusik ku Mantenna dibeulah, bijil cai, maranehna nginum saseubeuhna,

¹⁶cai ti jero cadas teh terus ngocor, mani kawas walungan bae.

¹⁷Tapi maranehna haben bae dosa ka Allah, di gurun keusik teh ngalawan ka Nu Maha Agung,

¹⁸ngahaja ngadoja ka Allah, marenta dahareun kahayangna.

¹⁹Tinggelendeng ngomongkeun ka Allah, ”Iasaeun Allah ngayakeun dahareun di gurun keusik?

²⁰Memang Mantenna meupeuh cadas bijil cai, terus ngagolontor jadi susukan, cik iasaeun ngayakeun roti jeung daging keur umat-Na?”

²¹Ngadangu kitu PANGERAN bendu, seug umat-Na teh diruksak ku seuneu. Pohara benduna ka maranehna,

²²lantaran teu tarigin ka Mantenna, teu palercayaeun yen Mantenna baris nulung.

²³Ti dinya Mantenna nimbalan ka langit, miwarang mukakeun lawang-lawangna;

²⁴Mantenna nurunkeun gandum ti sawarga, nya eta manna, keur dahareun maranehna.

²⁵Jadi maranehna ngadahar kadaharan para malaikat, sapamenta maranehna dipaparinkeun.

²⁶Sarta Mantenna miwarang angin wetan ngahiuk, sarta ku pangawasa-Na angin kidul ngagelebug,

²⁷ngintun manuk ka umat-Na, lobana tanding keusik di basisir,

²⁸murubut ka tengah pasanggrahanana di sakuliah tempat maranehna.

²⁹Umat-Na disina sareubeuh dahar, sakahayangna ditumutkeun.

³⁰Tapi tacan ge puas napsu maranehna, sabot keur dalahar keneh,

³¹geus matak bendu PANGERAN. Heug jelema-jelema anu pangbaredasna, pamuda-pamuda Israil, ku Mantenna dibinasa.

³²Tapi maranehna taya kakapok, doraka teu euih-euih, teu ngarandel bae kana kaajaiban Mantenna.

³³Anu matak umurna ku Mantenna dianggeuskeun, lir napas sarenghap, tumpes dadak sakala.

³⁴Upama ku Allah geus aya nu dibinasa, kakara areling ka Mantenna, nembongkeun pertobat jeung sasambat.

³⁵Kakara areling yen Allah teh panyalindunganana, yen Nu Maha Kawasa teh panulung maranehna.

³⁶Tapi ngakuna kitu teh ngan semet biwir, teu terus jeung hate.

³⁷Saenyana mah maranehna teu saratia, henteu tigin kana jangjina ka Mantenna.

³⁸Tapi Allah mah mikawelas ka umat-Na. Dosa-dosana dihampura, maranehna henteu dibinasa. Sering pisan Mantenna mengkek bendu-Na, nahan wera nu ngagegedur;

³⁹reh kaemut, yen maranehna teh mahluk teu langgeng teu beda ti angin, geus ngaliwat terus musna.

⁴⁰Di gurun keusik sering pisan ngalawan, sering nganalangsakeun manah-Na.

⁴¹Pek deui, pek deui ngadoja ka Allah, ngajaheutan galih Nu Maha Suci Allahna Israil.

⁴²Parohoeun kana kakawasaan Mantenna, parohoeun waktu maranehna dileupaskeun ti musuh-musuhna,

⁴³parohoeun kana kadigjayaan jeung mujijat Mantenna di dataran Soan wewengkon Mesir.

⁴⁴Mantenna ngarobah cai walungan-walungan jadi getih, nepi ka urang Mesir teu baroga cai keur nginum.

⁴⁵Mantenna ngadatangkeun laleur, nyiksa urang Mesir, geus kitu tanahna sina diruksak ku bangkong.

⁴⁶Mantenna ngadatangkeun simeut, meakkeun panenna, ngaruksakkeun lahan-lahanna.

⁴⁷Mantenna numpurkeun pelak anggur maranehna ku hujan buah tangkal-tangkal kormana bungbang ku hujan es.

⁴⁸Mantenna maehan sasatoan urang Mesir ku hujan es, maehan pipiaraanana sina disamberan ku gelap.

⁴⁹Mantenna ngalantarankeun maranehna susah gede, ditarajang ku amarah jeung napsu Mantenna anu ngagedur, anu datangna lir para malakal maot.

⁵⁰Mantenna masih keneh tuluy bendu-Na, henteu lebareun ku nyawa maranehna, anu tuluy dibasmi ku hiji pagebug.

⁵¹Mantenna maehan anak-anak cikal, sakabeh cikal unggal kulawarga urang Mesir.

⁵²Geus kitu Mantenna nuyun umat-Na kaluar, lir hiji pangangon. Maranehna dituyun ngambah gurun keusik.

⁵³Umat-Na diaping, aman teu aya kasieun; ari musuh-musuhna mah tumpur kagulung ku laut.

⁵⁴Umat-Na dicandak ka tanah kagungana-Na nu suci, ka tanah pagunungan beunang Mantenna ngajabel.

⁵⁵Urang dinyana diusiran ku Mantenna samemeh umat-Na narepi. Tanahna dibagikeun ka kaom-kaom Israil, imah-imahna diserenkeun ka umat-Na.

⁵⁶Tapi umat-Na anggur ngaralawan, ngadoja ka Allah Nu Maha Kawasa, henteu narurut kana parentah-Na,

⁵⁷alalingkar, teu satia, teu beda ti karuhunna, kawas jamparing bengkung teu bisa dipercaya.

⁵⁸Narangtang ka Allah ku nyarembah ka brahala nyarieun arca sesembahan, matak jaheut ka Mantenna.

⁵⁹Ningali kitu Allah teh bendu, umat-Na ditolak sama sakali.

⁶⁰Kemah kagungana-Na di Silo, tempat linggih-Na di tengah manusa ditilar.

⁶¹Peti Perjangjian lambang kakawasaan jeung kamulyaana-Na, ku Mantenna diantep dirampas ku musuh.

⁶²Awahing ku bendu, umat-Na diantep diparaehan ku musuh-musuhna.

⁶³Para pamudana tariwas di pangperangan, para mojangna teu aya nu ngawin.

⁶⁴Imam-imam tariwas ku pedang, randa-randana teu meunang nyaleungceurikan.

⁶⁵Ti dinya PANGERAN ngorejat, lir nu gugah tina kulem, lir jalma gagah anu kahudang wawanen ku anggur.

⁶⁶Musuh-musuh-Na dipukul mundur, areleh nepi ka salilana nandangan kaera.

⁶⁷Tapi Mantenna nolak turunan Yusup jeung teu kersaeun milih kaom Epraim.

⁶⁸Mantenna anggur milih kaom Yuda jeung Gunung Sion, kameumeut-Na.

⁶⁹Di dinya Mantenna ngadegkeun Bait-Na kawas panglinggihana-Na nu di sawarga, tohagana satohaga bumi, reugreug pageuh sapapanjangna.

⁷⁰Mantenna milih abdi-Na, Daud, dicandak ti pangangonan.

⁷¹Tina purah ngurus domba, Daud ku Mantenna dijieun raja Israil, anu ngangon umat Allah.

⁷²Umat Allah teh ku Daud diurus kalawan hade, diaping dijaring kalayan binangkit.