Read Boros Dusun JABUR 83 Bible Online

JABUR 83 - Boros Dusun bible

JABUR 83

¹Lagu. Jabur Asap.

²Nun Allah, mugi ulah tiis-tiis galih, raos-raos mindel sareng antepan.

³Tingali, musuh teh motah, anu careuceub ka Gusti teh barontak,

⁴parantos ngatur siasat, niat ngalawan ka umat Gusti, sakait bade ngarurug umat asuhan Gusti.

⁵Maranehna susumbar, ”Bangsa Israil urang tumpes sina tong kainget-inget deui.”

⁶Maranehna parantos sauyunan, parantos ngahiji bade ngalawan ka Gusti.

⁷Urang Edom sareng urang Ismail, urang Moab sareng urang Hajar,

⁸urang Gebal, urang Amon, sareng urang Amalek, urang Pelisti sareng urang Tirus,

⁹malah urang Asur ge ngahiji ka dinya, ngabantu urang Amon sareng urang Moab, turunan Elut.

¹⁰Samikeun nasib maranehna sareng urang Midian, sareng Sisera sareng Yabin di Walungan Kison tea,

¹¹anu ku Gusti parantos dicaremkeun di Endor, mayit-mayitna baruruk jadi taneuh.

¹²Para pamingpinna damel sapertos ka Oreb sareng Seeb, para pangerehna elehkeun sapertos Sebah sareng Salmuna,

¹³nu susumbar kieu tea, ”Tanah Allah urang rampas!”

¹⁴Nun Allah, awut-awut maranehna sina mancawura sapertos lebu, lir huut katebak angin.

¹⁵Gusti sing sapertos seuneu ngahuru leuweung, ngagegedag ngaduruk gunung.

¹⁶Kebutkeun maranehna ku angin ribut ti Gusti, reuwaskeun maranehna ku angin rongkah kagungan Gusti.

¹⁷Popokan beungeut maranehanana ku wiwirang, nun PANGERAN, sina ngaraku kana kakawasaan Gusti.

¹⁸Sina wirang, sina teu eureun-eureun tagiwur, sina paraeh dina kahinaan.

¹⁹Supados maranehna ngarasa, yen mung Gusti nu jumeneng PANGERAN, anu murbeng sakuliah jagat.