Read Boros Dusun JABUR 89 Bible Online

JABUR 89 - Boros Dusun bible

JABUR 89

¹Lagu atikan ti Etan, urang Esrah.

²Abdi salamina bade nganyanyikeun satia asih Gusti, nun Allah, salamina bade ngamashurkeun kasatiaan Gusti.

³Abdi terang kaasih Gusti tetep salalamina kasatiaan Gusti sateguh langit.

⁴Saur Gusti, ”Kami geus jangji ka hiji jalma pilihan Kami; Kami geus sumpah ka Daud, abdi Kami,

⁵ʼHiji turunan maneh salawasna bakal jadi raja, tahta karajaan maneh bakal langgeng.ʼ ”

⁶Satungkebing langit muji kaajaiban padamelan Gusti, nu saruci muji-muji kasatiaan Gusti, nun PANGERAN.

⁷Di sawarga teu aya nu sapertos Gusti, teu aya mahluk sawarga anu nandingan Gusti.

⁸Dina pasamoan mahluk-mahluk suci, Gusti pada mikagimir, sadayana alajrih ka Gusti.

⁹Nun GUSTI Allah Nu Maha Kawasa, teu aya anu hebatna sapertos Gusti, Gusti satia dina sagala perkawis, nun PANGERAN.

¹⁰Gusti murba kana kaangkaraan laut, ombakna nu ngamuk ku Gusti dilelerkeun.

¹¹Rahab, naga laut, ku Gusti dipaehan, diremukkeun, musuh-musuh kucar-kacir ku kawasa Gusti.

¹²Langit kagungan Gusti, bumi oge kagungan Gusti, alam dunya saeusina nya Gusti anu ngagelarkeun.

¹³Kaler sareng kidul Gusti anu nyiptakeun, Gunung Tabor sareng Gunung Hermon nyanyi kangge Gusti.

¹⁴Kawasa Gusti tanpa tanding! Gusti bedas liwat saking!

¹⁵Karajaan Gusti napak dina kaestuan sareng kaadilan, kaasih sareng kasatiaan tembong dina samudaya karya Gusti.

¹⁶Estu bagja jalmi anu sumujud ka Gusti bari gumbira, anu hirupna dina cahaya kasaean Gusti.

¹⁷Sadidintenna suka bungah ku karana Gusti, muji sukur ku karana piwelas Gusti.

¹⁸Gusti maparin kaunggulan ka abdi-abdi, ku karana asih Gusti abdi-abdi tiasa unggul.

¹⁹Gusti, nun PANGERAN, maparin papayung, Gusti, Nu Suci, Allah Israil, maparin raja ka abdi-abdi.

²⁰Ti kapungkur keneh, dina hiji titingalian, Gusti ngandika ka para kawula Gusti nu saratia, ”Kami geus nulung hiji prajurit anu kamashur, diangkat ti tengah rahayat, sina ngadiukan tahta.

²¹Abdi Kami Daud, ku Kami dijadikeun raja, geus diistrenan ku Kami ku minyak suci.

²²Salawasna baris dideudeul ku kabedasan Kami, kakawasaan Kami baris jadi kakuatanana.

²³Musuh-musuhna moal bisa ngelehkeun, nu daroraka moal bisa meunang ka manehna.

²⁴Kami nu baris nyasaak musuh-musuhna, Kami nu baris maehan nu ngarewaeunana.

²⁵Kami rek mikanyaah, rek satia ka manehna, ku Kami rek disina meunangan terus.

²⁶Karajaanana rek dilegakeun, ti Laut Tengah nepi ka Walungan Eprat.

²⁷Ngabasakeunana ka Kami, ʼRama, Allah abdi. Ama benteng sareng panyalindungan abdi.ʼ

²⁸Estu, ku Kami rek dijieun anak cikal, anu pangpunjulna ti sakabeh raja-raja.

²⁹Jangji Kami ka manehna salawasna bakal ditedunan, perjangjian Kami ka manehna bakal langgeng.

³⁰Tahtana rek dipageuhkeun sapageuh langit, ti turunanana salawasna aya bae anu pijadieun raja.

³¹Tapi lamun turunanana teu nurut kana hukum Kami, hirupna teu nurutkeun parentah-parentah Kami,

³²lamun ngalanggar aturan-aturan jeung katangtuan-katangtuan Kami,

³³maranehna geus tangtu baris dihukum, baris disusahkeun ku karana kasalahanana.

³⁴Najan kitu kanyaah Kami ka Daud moal laas, jangji Kami ka manehna moal gingsir.

³⁵Perjangjian Kami ka manehna moal pegat, jangji Kami sarupa ge moal aya nu dicabut.

³⁶Sabab Kami geus sumpah demi kasucian Kami: pamohalan Kami jalir ka Daud!

³⁷Salawasna bakal aya turunanana, karajaanana baris diaping ku Kami satungtung aya keneh panonpoe.

³⁸Sina tetep aya saperti bulan, nu jadi saksi satia di langit.”

³⁹Nanging Gusti bet bendu ka anjeunna, raja pilihan Gusti ku Gusti dipiceun, ditolak.

⁴⁰Perjangjian Gusti ka anjeunna dipegatkeun, makutana ku Gusti dialungkeun ka nu jeblog.

⁴¹Kuta-kuta kotana dirugrugkeun, benteng-bentengna diburak-barik,

⁴²harta milikna diranjah ku nu laliwat, sarta anjeunna diseungseurikeun ku para tatangga.

⁴³Musuh-musuhna ku Gusti disina unggul, disina saruka bungah.

⁴⁴Anjeunna disina eleh perangna, pakarangna disina taya gunana.

⁴⁵Iteuk karajaanana ku Gusti dicandak, tahtana dibeubeutkeun kana taneuh.

⁴⁶Mangsa anomna ku Gusti disinggetkeun, dipopokan ku kahinaan.

⁴⁷Na Gusti teh bade teras nyumput bae? Bade dugi ka iraha Gusti bendu ngagugudug?

⁴⁸Mugi diemut, umur abdi teh kacida pondokna. Mugi diemut, manusa teh ku Gusti dijadikeun mahluk pana.

⁴⁹Saha pijalmieunana anu moal keuna ku ajal, anu tiasa ngejat tina alam kubur?

⁵⁰Nun PANGERAN, mana tanda kanyaah Gusti anu kapungkur teh? Mana jangji-jangji Gusti ka Daud teh?

⁵¹Ulah lali, abdi Gusti sakieu diasorkeunana, nandangan panghina bangsa-bangsa deungeun.

⁵²Nun PANGERAN, raja pilihan Gusti teh dihina ku musuh-musuh Gusti! Mios ka mana ge teu weleh dinistakeun.

⁵³Puji PANGERAN salalanggengna! Amin! Amin!