Read Boros Dusun JABUR 91 Bible Online

JABUR 91 - Boros Dusun bible

JABUR 91

¹Anu nyalindung ka Nu Maha Agung, anu aya dina pangraksa Nu Maha Kawasa,

²bisa unjukan ka Mantenna, ”Gusti teh benteng panyalindungan abdi, Allah pangharepan abdi.”

³Mantenna baris ngajaga anjeun tina bahya nu teu tembong, tina panyakit anu mateni.

⁴Mantenna baris mindingan anjeun ku jangjang-Na, anjeun baris aman dina pangraksa-Na, baris dijaga jeung ditangtayungan ku kasatiaana-Na.

⁵Ti peuting teu kudu mingsir sieun balahi, ti beurang teu kudu rempan ku bahaya ngadadak.

⁶Teu kudu risi ku panyakit nu datangna waktu poek, teu kudu rentag ku ajal anu narajang waktu caang beurang.

⁷Najan sarebu anu rebah di gigireun, sapuluh rebu di sakurilingeun, anjeun mah moal kieu-kieu.

⁸Ku anjeun bakal katingal, kumaha siksaanana jelema jahat.

⁹Sabab nya PANGERAN nu ku anjeun dijieun panyalindungan, nya Nu Maha Agung nu ku anjeun dipake panyaluuhan.

¹⁰Anu matak, bahya moal aya anu datang, kaniaya moal aya nu nyampeurkeun ka eusi imah anjeun.

¹¹Allah baris nempatkeun malaikat-malaikat-Na, ngajaga anjeun sanajan aya di mana.

¹²Ku eta anjeun teh ditaranggeuy, sangkan suku anjeun teu ngagasruk kana batu.

¹³Singa galak jeung oray matih ge ku anjeun baris bisa ditincakan.

¹⁴Allah ngandika, ”Jalma nu nyaah ka Kami tangtu ku Kami disina salamet. Anu ngaku yen Kami teh PANGERAN tangtu ku Kami ditangtayungan.

¹⁵Ana maranehna nyambat ka Kami tangtu dibales. Ana maranehna kasusahan, tangtu ku Kami dibaturan, tangtu ditulungan jeung dibere kahormatan.

¹⁶Umurna rek dipanjangkeun, ku Kami rek disalametkeun.”