Read Boros Dusun JABUR 92 Bible Online

JABUR 92 - Boros Dusun bible

JABUR 92

¹Lagu keur poe Sabat.

²Muji sukur ka Gusti teh lampah utami, nun PANGERAN, muji, ngahormat ka Gusti, Allah Anu Maha Agung,

³ngabewarakeun satia asih Gusti unggal enjing, sareng kasatiaan Gusti unggal wengi,

⁴bari nabeuh tatabeuhan kawat, sareng lagu nganggo kacapi.

⁵Padamelan Gusti anu harebat ngabungahkeun abdi, abdi nyanyi gumbira ku hal anu parantos dipidamel ku Gusti.

⁶Ku agung padamelan Gusti, nun PANGERAN; mamanahan Gusti sanes teuleum-teuleumaneun!

⁷Moal kasungsi ku jalmi tuna pangarti, moal kahontal ku jalmi bodo.

⁸Nu daroraka najan mekar cara jujukutan, nu jarahat najan hirupna sarenang, tangtos bakal ajur tumpur,

⁹reh Gusti teh nun PANGERAN, kawasa salalanggengna.

¹⁰Abdi-abdi yakin, musuh-musuh Gusti bakal tumpur, nu jarahat teh bakal kasoran.

¹¹Abdi ku Gusti disina bedas lir banteng alas, dipaparin kasenangan.

¹²Parantos katingal musuh abdi teh areleh, parantos kakuping tingkoceakna anu jarahat.

¹³Jalma bener bakal ngagedean cara tangkal korma, bakal jaradi cara kiputri Libanon.

¹⁴Maranehna ibarat tatangkalan nu dipelak di gedong PANGERAN, jararadi di Bait-Na Allah urang,

¹⁵nepi ka kolotna ge masih keneh buahan, tetep subur hejo ngemploh.

¹⁶Eta nembongkeun yen PANGERAN teh adil, panyaluuhan kaula estu taya kuciwana.