Read Boros Dusun JABUR 94 Bible Online

JABUR 94 - Boros Dusun bible

JABUR 94

¹Nun PANGERAN, Gusti teh Allah nu nyepeng wawales. Tembongkeun wawales ti Gusti!

²Gusti teh hakim sakumna manusa, bales jalmi nu sarombong teh masing satimpal!

³Sabaraha lamina deui nu daroraka senang-senang? Sabaraha lamina deui, nun PANGERAN?

⁴Sabaraha lamina deui nu jarahat sarombong, aragul ku kajahatanana?

⁵Maranehna ngekecek umat Gusti, nun PANGERAN, ngagencet umat kagungan Gusti.

⁶Randa sareng barudak pahatu diparaehan, kitu deui anu ngalumbara di ieu tanah.

⁷Carek maranehna, ”Moal kanyahoan ku PANGERAN, Allahna Israil teh moal malire.”

⁸He rahayat, ku naon barodo-barodo teuing? Iraha rek daraek diajar?

⁹Allah nu ngadamel ceuli urang, moal enya teu ngadangu? Mantenna nu ngadamel panon urang, moal enya teu ningali?

¹⁰Allah anu nyeuseul bangsa-bangsa, moal enya moal ngahukum? Mantenna guru sakumna manusa, moal enya taya kauninga-Na?

¹¹PANGERAN uninga kana pikiran maranehna, kauninga yen kabeh ge mubadir.

¹²Bagja jalmi anu dididik ku Gusti, nun PANGERAN, sina terangeun kana hukum Gusti!

¹³Dina mangsa aya pakewuh, ku Gusti disina ayem, dugi ka nu jahat teh beunang ku burang.

¹⁴PANGERAN moal ngabodokeun umat-Na, pamohalan nilarkeun sakur nu jadi kagungana-Na.

¹⁵Kaadilan baris aya deui di pangadilan, sarta baris disokong ku nu jalujur.

¹⁶Saha nu bela ka abdi, ngalawan anu jarahat? Saha nu aya gigireun abdi, ngalawan para durjana?

¹⁷Upami teu aya pitulung PANGERAN, tangtos abdi parantos pindah ka enggon anu maraot.

¹⁸Sanggem pikiran, ”Aduh tiguling,” nanging teras disangkeh ku satia asih Gusti.

¹⁹Nalika abdi nuju honcewang seueur kasalempang, ku Gusti dililipur malar janglar.

²⁰Gusti tara biluk ka hakim-hakim nu serong, anu ngesahkeun kateuadilan,

²¹anu sapongkol nyalahkeun nu bener, anu nerapkeun hukum pati ka nu teu salah.

²²Untung kaula, dibela ku PANGERAN diraksa ku Allah kaula.

²³Kajahatan maranehna baris dihukum ku Mantenna, ditumpes ku karana dosa-dosana, geus tangtu baris ditumpes, ku PANGERAN, Allah urang.