Read Boros Dusun SILOKA 10 Bible Online

SILOKA 10 - Boros Dusun bible

SILOKA 10

¹Ieu pituah-pituah Suleman: Anak pinter bapa nu bungah. Anak gejul indung nu nalangsa.

²Harta banda beunang teu jujur, moal aya berekahna. Ari jujur mah matak rahayu.

³Jalma bener ku PANGERAN moal diantep kalaparan. Jalma jahat mah angen-angenna ku PANGERAN dipegat sina teu laju.

⁴Nu kedul baris muluntu. Anu getol mah pibeunghareun.

⁵Anu rajin ngumpulkeun pare dina usum dibuat eta jelema binangkit. Anu kebluk dina usum panen mah jelema pikacelaeun.

⁶Jelema bener baris narima berekah. Ucapan jalma jahat mah ngandung niat nu telenges.

⁷Jelema bageur mah mangrupa berekah, bakal dipikatineung, sabalikna nu jahat mah baris tereh kapopohokeun.

⁸Jalma binangkit, daek narima pituah. Nu gejul omonganana mah baris tijuralit.

⁹Jalma jujur bakal lulus mulus. Nu teu jujur mah pasti kabitur.

¹⁰Jalma anu sumput salindung ngadatangkeun kasusah. Jalma nu wani mere panggeuing mah ngusahakeun karapihan.

¹¹Pitutur jelema hade teh jadi sumberna hirup. Ucapan jelema jahat mah ngandung niat nu telenges.

¹²Kaceuceub teh ngahudang picekcokeun, ari kanyaah mah hampuraan kana sagala kasalahan.

¹³Jalma nu luhur pangarti, omonganana ngareusi. Jalma gejul mah geus sapantesna mun kahukum.

¹⁴Jalma pinter sanggup ngudag sagala pangarti. Sabalikna anu gejul mah saucap-ucapna teh dareukeut ka pibahlaeun.

¹⁵Kakayaan ngabenteng jalma baleunghar. Kamiskinan mah ngabinasa nu mariskin.

¹⁶Kahadean teh ganjaranana hirup jamuga. Ari dosa mah kalah ka nungtun kana dosa deui.

¹⁷Jalma nu daek nampa panggeuing tangtu salamet. Anu embung disalahkeun mah hirupna dina bahaya.

¹⁸Jalma anu nyumputkeun kangewa, eta ngabohong. Jalma anu resep ngupat mah eta teh jelema gejul.

¹⁹Beuki loba omong beuki loba masiat. Jalma lantip budi mah resep keneh balem.

²⁰Pitutur jelema bener saibarat perak tulen. Ari jalma jahat mah pipikiranana taya hargana.

²¹Pitutur jelema bener matak untung jalma rea. Sabalikna jalma gejul mah paeh ku kagejulanana.

²²Berkah PANGERAN nu ngabeungharkeun teh, ari saukur getol mah moal matak nambahan beunghar.

²³Jalma gejul resep kana lampah teu uni. Nu luhur pangarti mah mikaresep kana hikmah.

²⁴Jalma bener bakal laksana kahayangna. Ari nu jahat mah kalah ka meunang anu dipikasieun.

²⁵Ana datang topan, nu gejul kapangpengkeun, ari nu jujur mah salamet.

²⁶Nitah ka nu kedul mah matak bae jengkel, mun cuka mah matak linu kana huntu, mun haseup matak peurih kana panon.

²⁷Sieun ku PANGERAN matak panjang umur, da nu jahat mah paehna ge samemeh mangsa.

²⁸Harepan jelema bener matak ngabungahkeun. Ari jelema jahat mah harepanana mubadir.

²⁹Jalma jujur ku PANGERAN diraksa. Jalma salah mah dibinasa.

³⁰Jelema bener salawasna reugreug. Ari nu jahat mah moal bisa tetep nyicingan tanah.

³¹Jelema bener nyaritana wijaksana. Ari jelema anu sok goreng sungut mah, letahna baris diured.

³²Jelema bener nyaho kana pitutur anu aya maunatna. Jelema jahat mah saucap-ucapna teh panipuan wungkul.