Read Boros Dusun SILOKA 11 Bible Online

SILOKA 11 - Boros Dusun bible

SILOKA 11

¹PANGERAN mikangewa ka nu make timbangan curang. Mantenna misuka ka nu nimbangna bener.

²Jalma adigung bakal meunang pamoyok, mending oge handap asor.

³Jalma hade ditungtun ku kajujuran. Jalma curang bakal cilaka ku curangna.

⁴Dina waktu geus nyanghareup kana ajal, harta banda taya hartina kajujuran mah matak rahayu.

⁵Keur jalma hade mah jujur teh matak nguntungkeun hirup. Ari jalma jahat mah sok nyilakakeun maneh.

⁶Kaadilan nyalametkeun jalma jujur. Ari tukang cidra cilaka ku sarakahna.

⁷Jalma jahat ana paeh, harepanana ge paeh. Harta banda teu bisa dipake andelan.

⁸Kasusahan moal datang ka jalma saleh, datangna ka jalma jahat.

⁹Omongan jalma jahat matak binasa, sabalikna hikmah jelema saleh mah matak salamet.

¹⁰Anu jujur ana meunang bagja, sanagara milu suka. Sabalikna jalma jahat mah ana paeh pada nyurakan.

¹¹Ku restuna jalma-jalma jujur, kota bisa alus. Sabalikna ku omongan jalma-jalma jahat mah kota teh ruksak.

¹²Ngahina batur kalakuan anu gejul. Nu lantip mah sungutna repeh.

¹³Jelema laer biwir moal bisa dibawa rasiah. Sabalikna nu satia layak dipercaya.

¹⁴Bangsa bakal runtuh lamun taya anu mingpin, sabalikna bisa kuat lamun loba juru nasehatna.

¹⁵Ulah sasanggupanan mangnanggungkeun hutang batur, bisi kaduhung. Leuwih aman teu pipilueun.

¹⁶Istri lungguh mah hormateun, sabalikna awewe teu boga budi mah nista. Jalma kedul mustahil rek boga duit. Nu rikat usahana mah pibeunghareun.

¹⁷Lamun urang bageur tangtu loba anu mikaheman. Kejem mah sarua jeung nyiksa maneh.

¹⁸Jelema jahat mah najan beubeunangan ge taya mangpaʼatna. Sabalikna mun pagawean urang bener, tangtu meunang ganjaran.

¹⁹Boga niat rek milampah hade tangtu baris jamuga. Tapi mun keukeuh boga niat jahat, tinangtu bakal tiwas.

²⁰Angen-angen jahat kaceuceub PANGERAN, ari lampah bener nyukakeun kana manah-Na.

²¹Sing yakin, nu jahat tangtu dihukum, nu bener tangtu luput tina siksaan.

²²Istri geulis tanpa kaperyogaan, saibarat anting emas dina cungur bagong.

²³Angen-angen jelema bener, salawasna alus jadina. Sabalikna jelema jahat, ana kahayangna laksana, matak ambek saban jalma.

²⁴Aya jalma anu bisa samemena make duitna, tapi kalah ka beuki beunghar. Ari nu pohara cecelna kalah ka tambah kokoro.

²⁵Nu balabah babari meunang rejeki. Nu resep tutulung babari meunang pitulung.

²⁶Anu sok nahan pare ngadago undakna harga bakal pada nyumpahan. Ari dijual harita mah pada maruji.

²⁷Maksud maneh lamun hade tangtu pada ngahargaan. Sabalikna neangan pisusaheun mah tangtu meunang kasusahan.

²⁸Nu umangkeuh ku kabeungharan baris ragrag ngoleang, lir daun murudul usum muguran. Sabalikna jalma bageur baris subur, lir tangkal gomplok daunna.

²⁹Nu nyusahkeun kulawarga matak moal boga naon-naon. Nu barodo salawasna kudu ngawula ka nu palinter.

³⁰Jalma bener mah ngahirupan, jalma telenges mah ngarampas nyawa.

³¹Lamun jalma bener di dunya keneh geus meunang ganjaran, jalma jahat jeung boga dosa oge geus pasti baris dihukum.