Read Boros Dusun SILOKA 12 Bible Online

SILOKA 12 - Boros Dusun bible

SILOKA 12

¹Jalma nu boga pangarti mah dibejaan salahna teh atoh. Ngan nu gejul nu embung dibebener mah.

²PANGERAN misuka jelema bener. Ari jelema julig ku Mantenna dihukum.

³Jalma doraka hirupna moal aman. Jalma bener mah reugreug.

⁴Pamajikan bageur matak reueus matak bungah salaki. Pamajikan nu ngerakeun mah ibarat panyakit dina tulang-tulangna.

⁵Jalma jujur resep terus terang. Ari tukang cidra mah ngan arek nipu.

⁶Ucap-ucapan jelema jahat mah nyilakakeun. Sabalikna ucap-ucapan jelema bener mah ngajait nu keur kaancam.

⁷Jalma jahat baris tumpur jeung moal boga turunan. Ari rumah tangga jelema bener mah tangtu jamuga.

⁸Anu boga kapinteran tangtu pada ngajenan. Nu bodo mah pada nyapirakeun.

⁹Mending jadi jelema biasa, dapon wekel kana usaha, ti batan niru-niru menak, tapi hirup seuseut seuat.

¹⁰Jelema hade mah rumawat kana pipiaraan. Nu jahat mah telenges kana pipiaraan teh.

¹¹Jurutani anu wekel digawe moal kurang dahareun. Kacida bodona miceunan waktu pikeun hal nu mubadir.

¹²Jalma jahat ngan nyiar pidorakaeun, ari nu bener mah hirupna teh reugreug.

¹³Jalma jahat kabeulit ku omonganana keneh. Ari ku nu jujur mah pikasusaheun ge luput.

¹⁴Ganjaran teh gumantung kana ucap jeung laku lampah, saimbang jeung pagawean.

¹⁵Jalma gejul mah sok ngarasa bener bae. Sabalikna nu wijaksana mah daek narima pituah.

¹⁶Lamun jalma palung pundung, sok terus nangarkeun maneh. Ari nu lantip mah tahan ku pangweweleh.

¹⁷Lamun maneh nyarita nu saenyana, kaadilan baris jalan. Sabalikna lamun bohong, kaadilan moal jalan.

¹⁸Omongan anu teu dipikir heula lir pedang nojos, jero ngaraheutanana. Demi omongan anu make akal budi mah jadi tamba.

¹⁹Bohong mah moal tahan lila-lila. Sabalikna nu saestuna mah tagen sapapanjangna.

²⁰Nu ngareka kajahatan, ngareka picilakaeun. Sabalikna anu nyieun pibenereun mah baris pinanggih bagja.

²¹Jalma ibadah mah moal meunang mamala. Sabalikna jalma jahat tangtu meunang susah.

²²PANGERAN ngewa ka tukang bohong, sabalikna misuka ka nu nedunan jangjina.

²³Jalma lantip mah tara ieu aing nyaho, sabalikna anu palung mah nembrakkeun kabodoanana.

²⁴Wekel digawe matak boga kawasa. Nu kedul mah paling-paling jadi badega.

²⁵Ku kasusah mah jalma teh leungit kabagjaanana, tapi ku pangbeberah mah kasusahna paler.

²⁶Jalma bener jadi tuduh jalan ka nu sejen, demi nu jahat mah sabalikna, sok nyasabkeun ka batur.

²⁷Anu kedul moal bisa ngahontal udaganana, sabalikna nu rajin mah baris pinanggih jeung bagja.

²⁸Bener teh nungtun kana jalan hirup. Ari kagejulan nungtun kana jalan pipaeheun.