Read Boros Dusun SILOKA 15 Bible Online

SILOKA 15 - Boros Dusun bible

SILOKA 15

¹Jawaban sareh nyirnakeun amarah. Jawaban nyogok ngahudang napsu.

²Jalma nu boga pangarti mah ana nyarita kaciri yen ngeusi. Nu burung mah harus omongna wungkul.

³PANGERAN uninga kana kajadian di mana-mana. Kalakuan urang boh nu hade boh nu goreng ku Mantenna katilik.

⁴Ucap genah matak seger, ucap anu garihal mah nyentug.

⁵Goreng pisan anak ngalalaworakeun papatah bapa. Anu ngestokeun panggeuing bapana nandakeun yen tumarima.

⁶Jelema bener mah harta bandana karaksa. Harta banda jalma jahat mah bakal beak dina usum suker.

⁷Kanyaho teh nyebarna ti nu palinter, lain ti nu barodo.

⁸Paneda jalma balener kamanah ku PANGERAN. Sabalikna jalma jarahat mah pangbaktina ge dipikageuleuh.

⁹PANGERAN ceuceub kana cara hirupna jalma doraka, tapi asih ka jalma nu hade lampah.

¹⁰Mun lampah urang goreng tangtu dihukum beurat. Jalma nu embung narima pepeling moal jamuga.

¹¹Nu aya di enggon nu paeh ge ku PANGERAN mah kauninga. Jadi pimanaeun manusa bisa nyumputkeun eusi hatena ti Allah?

¹²Tukang cacawad mah embung digeuing, tara teh teuing daek tatanya ka nu palinter.

¹³Jalma nu keur meunang kabungahan, budina marahmay, ari keur bingung mah nguyung.

¹⁴Pangarti teh ku nu pinter mah diulik, ari nu gejul mah geus bodo teh enggeus bae.

¹⁵Nu mariskin hirupna teu weleh ripuh, ari anu sararenang tara kendat sukan-sukan.

¹⁶Miskin oge ari iman ka PANGERAN mah leuwih bagja ti batan beunghar tapi loba kasusah.

¹⁷Mending keneh dahar saukur jeung lalab jeung jalma nu dipikanyaah, ti batan dahar jeung daging tapi bari aya kangewa.

¹⁸Barangasan nungtun kana picekcokeun, sabar mah nungtun kana karuntutan.

¹⁹Di mana-mana ge ari kedul mah hese hirup. Hayang ulah manggih susah mah kudu jujur.

²⁰Anak anu bijaksana nyenangkeun hate bapana. Ngan jalma gejul anu ngarendahkeun ka indung mah.

²¹Nu gejul mah bodo oge ngeunah-ngeunah bae. Ari nu dilampahkeun ku nu pinter mah pagawean bener.

²²Kudu getol tatanya heula, tangtu hasil nya maksud. Mun teu kitu bororaah.

²³Pohara nyugemakeunana mere jawaban nu nya cocog ucapna nya cocog jeung kaayaan.

²⁴Jalma binangkit mah jalanna teh ka luhur ngajugjug kana hirup, lain ka handap kana pipaeheun.

²⁵Nu adigung baris ditumpes rumah tanggana ku PANGERAN. Sabalikna pangaboga randa mah ku Mantenna ditangtayungan.

²⁶PANGERAN mikagiruk pipikiran jelema goreng, sabalikna misuka kana ucap-ucap nu darehdeh.

²⁷Nyokot untung bari teu jujur, matak susah anak rabi. Tong daek nampa panyogok sangkan bisa hirup mayeng.

²⁸Jelema hade mah memeh ngajawab teh mikir heula. Sabalikna jelema goreng mah gancang ngajawab, tapi matak nyusahkeun.

²⁹Paneda jelema hade ku PANGERAN didangu, nu doraka mah moal dipirosea.

³⁰Parangi hade ngagumbirakeun hate, beja hade matak lega rarasaan.

³¹Daek malire kana panggeuing, nandakeun yen bijaksana.

³²Mun urang nolak kana nasehat, nu rugi diri sorangan. Sabalikna mun daek narima pepeling, bakal jadi leuwih bijaksana.

³³Sieun ku PANGERAN teh atikan nu mawa hikmah. Mun hayang kaajen kudu handap asor heula.