Read Boros Dusun SILOKA 16 Bible Online

SILOKA 16 - Boros Dusun bible

SILOKA 16

¹Manusa meunang nyieun pamaksudan, ari nu nangtukeunana mah Allah.

²Ceuk pangrasa urang mah pagawean urang teh hade bae. Ari PANGERAN mah nguji ka nu aya dina sanubari urang.

³Kudu nyuhunkeun ka PANGERAN sangkan rencana urang diberkahan, tangtu pagawean urang lulus.

⁴Sagala dadamelan PANGERAN aya tujuanana masing-masing. Mantenna geus nangtukeun yen nu jahat baris ditumpes.

⁵Nu arangkuh jadi kacua PANGERAN, tur moal bisa nyingkir tina hukuman.

⁶Kudu satia satuhu, tangtu dosa urang ku Allah dihampura. Kudu tumut ka PANGERAN, tangtu luput tina musibat.

⁷Mun urang nyukakeun manah PANGERAN, musuh oge bisa malik nyobat.

⁸Pangasilan saeutik ge ari beunang jujur mah leuwih mangpaʼat, ti batan loba tapi meunang teu bener.

⁹Manusa anu boga angen-angen, Allah anu memener lengkahna.

¹⁰Timbalan raja mah meunang kawasa ti Allah, putusanana salawasna adil.

¹¹Pamundut PANGERAN, timbangan jeung ukuran teh kudu bener, jujualan kudu jujur.

¹²Raja teu meunang ngantep kajahatan, sabab kuatna pamarentahan teh nya ku kaadilan.

¹³Raja mah kahoyongna ngadangu perkara nu saestuna, mikaresep ka sakur anu ngucapkeun anu sayaktina.

¹⁴Jalma anu bijaksana, narekahan sangkan raja senang manahna. Sabab lamun raja enggeus bendu, teu mustahil mun aya nu nepi ka paeh oge.

¹⁵Kurnia raja lir ibarat mendung nurunkeun hujan di musim halodo, matak ngahirupkeun.

¹⁶Boga pangarti jeung kapinteran mah leuwih utama ti batan boga emas perak.

¹⁷Jalma hade mah lampahna nyingkiran pibalahieun. Ku sabab eta kudu ati-ati lampah, sangkan rahayu.

¹⁸Adigung temahna ancur, angkuh temahna rubuh.

¹⁹Mending oge rendah hate jeung taya kaboga, ti batan milu ka jalma angkuh jeung milu kacemekan ku barang beunangna ngarampas.

²⁰Sing tigin kana piwulang, supaya lulus nya maksud. Masing ngandel ka PANGERAN, malar meunang kabagjaan.

²¹Jalma bijaksana anu sawawa, kaciri tina pangartina; tina carana nyarita, omonganana beuki tambah ngayakinkeun.

²²Hikmah teh sumber hirupna jalma anu bijaksana, tapi mapatahan jelema gejul mah ka hambur-hambur waktu.

²³Jalma berbudi mah memeh ngomong dipikir heula, jadi anu diucapkeunana teh bisa leuwih ngayakinkeun.

²⁴Ucap darehdeh ibarat madu, nya amis nya alus keur kasehatan.

²⁵Aya jalan anu disangka pisalameteun, padahal brasna kana pipaeheun.

²⁶Kajurung ku lapar, nu kuli mah beuki soson-soson digawena, sangkan bisa buru-buru dahar.

²⁷Jelema jahat mah ngan neangan bae jalan picilakaeun batur. Malah ucap-ucapna ge ngagudag-gudag ku kajahatan.

²⁸Jalma jahat resep nyebarkeun pitenah, kagorenganana dipake ngabengkahkeun anu eukeur sosobatan.

²⁹Jalma telenges mah ka baturna ge nipu merdaya, ngarah baturna cilaka.

³⁰Sing waspada ka nu nyengiran jeung ngiceupan, eta teh dina hatena mah boga niat jahat.

³¹Umur panjang jadi ganjaran ka jalma anu temen nya lampah, ari huis minangka makuta mulya.

³²Mending sabar ti batan gagah. Mending ge bisa ngered diri, ti batan bisa ngarebut hiji kota.

³³Taya halangan ngalung dadu oge geusan neguh pangersa Allah. Ari jawabanana mah ditangtukeun ngan ku Allah.