Read Boros Dusun SILOKA 18 Bible Online

SILOKA 18 - Boros Dusun bible

SILOKA 18

¹Jelema nu tara campur jeung batur, sok mentingkeun dirina bae. Kana paham batur, kajeun ceuk nu rea bener, tara satuju.

²Keur nu gejul mah ngarti sukur henteu kajeun. Maksudna ge ngan ukur hayang ngabengbrengkeun kapinteran sorangan.

³Dosa katut wiwirangna rerentetan. Mun harga diri geus leungit, kari hinana.

⁴Ucap-ucapan jelema bisa jadi hikmah, jero ibarat sagara, seger lir cai walungan.

⁵Condong ka nu salah jeung teu mere kaadilan ka jelema nu beresih tina kasalahan teh goreng pisan.

⁶Lamun nu gejul geus mimiti ngasongkeun alesan, eta sarua jeung menta paneunggeul.

⁷Nu gejul mah ana geus nyarita sok terus ngocoblak, nepi ka karingkus ku ucap-ucapna keneh.

⁸Aya ku genah ari ngadengekeun upatan! Mun kongang mah mani hayang nyamualkeun.

⁹Jalma kedul sarua gorengna jeung jelema nu ngaruksak.

¹⁰Jenengan PANGERAN lir benteng anu tohaga. Jalma anu ibadah bisa muru ka dinya, tangtu rahayu.

¹¹Ari ceuk pangrasa nu baleunghar, harta bandana teh bisa ngajaga dirina, lir kuta tohaga ngabudeur nagara.

¹²Ari hayang dihormat kudu rendah hate. Ari angkuh mah baris tijungkel.

¹³Memeh ngajawab regepkeun heula. Lamun henteu kitu, tetela maneh teh bodo, celaeun.

¹⁴Kahayang kana cageur ari keur gering, bisa nunjang kakuatan. Leungit eta, harepan ge musna.

¹⁵Jelema pinter mah kana nyiar elmu teh mani nyongsrong tur junun.

¹⁶Anjeun rek ngadeuheus ka jelema penting? Bawakeun tanda katineung, moal teu lungsur-langsar.

¹⁷Nu nyarita ti heula di pangadilan, memeh lawanna ngabantah mah caritana sok siga enya.

¹⁸Lamun dua jalma nu sarua kawasana padu di pangadilan, bisa disapih ku ngalung dadu.

¹⁹Kudu nulung ka dulur, engke manehna ngabela ka urang lir kuta anu tohaga ngabenteng nagara. Sabalikna lamun digetrengan, kaanjangan ge embungeun.

²⁰Jamuga moalna urang, gumantung kana omongan sorangan.

²¹Sabab hirup teh goreng ku omong hade ku omong. Balukar tina omongan urang, nu nanggungna urang-urang keneh.

²²Nu boga pamajikan teh estu jelema bagja. Eta teh rahmat PANGERAN.

²³Nu malarat mah ngucapkeun pamentana lengas-lengis. Tapi nu beunghar mah ana ngajawab teh ketus.

²⁴Loba sobat nu teu awet, aya oge nu satia leuwih ti dulur sorangan.