Read Boros Dusun SILOKA 20 Bible Online

SILOKA 20 - Boros Dusun bible

SILOKA 20

¹Anggur ari loba teuing mah matak ngacapruk kawas nu burung. Daek mabok mah bodo kabina-bina.

²Kudu gimir ku amarah raja, kawas gimir ku gaurna singa. Ngahudang amarahna sarua jeung maehan maneh.

³Lampah pujieun pisan nyingkiran anu garejul parebut padu mah.

⁴Lamun patani dina usum nyawah kedul ngawuluku, tangtu moal boga pibuateun.

⁵Pipikiran jelema teh saibarat cai dina sumur jero. Tapi ku anu berbudi mah teu burung katimba.

⁶Saban jalma sok ngakukeun satia, tapi ari anu enya satia mah langka.

⁷Bagja anu jadi anak, lamun bapana jujur sarta kalakuanana bener.

⁸Raja anu linggih dina korsi pangadilan, socana awas kana kajahatan.

⁹Jalma mana anu wani nyebutkeun yen dirina enyaan beresih, geus lubar tina dosana?

¹⁰Tukang malsu timbangan jeung meteran, jadi kagiruk PANGERAN.

¹¹Sipat budak oge boh jujur, boh bageur, tembong dina paripolahna.

¹²PANGERAN maparin panon keur nenjo, maparin ceuli pikeun ngadenge.

¹³Lamun waktu ngan dipake sare, nya malarat balukarna. Kudu ngoprek, sangkan seubeuh barang capek.

¹⁴Anu meuli, sabot nawar mah nyebutna teh mahal teuing, mahal teuing. Tapi ari geus beunang mah agul-agul, boga rasa pinter nawar.

¹⁵Lamun maneh ngarti kana hal anu keur diucapkeun sorangan, eta teh pangaboga anu pangajina leuwih ti emas atawa permata.

¹⁶Pohara kabalingerna sasanggupanan rek mangmayarkeun hutang batur teh, lantaran kudu jeung wani naruhkeun sakabeh kabogana.

¹⁷Barang beunang teu jujur, mimiti mah karasana lir kadaharan anu pohara ngeunahna, tapi lila-lila mah asa neureuy keusik.

¹⁸Tong asa-asa menta heula nasehat, sangkan hasil anu diseja. Rek tarung ge ulah ujug-ujug der, kudu asak tatahar heula.

¹⁹Nu beuki ngobrol mah teu bisa dibawa nyekel rasiah. Anu loba omong leuwih hade dijauhan.

²⁰Anu nyumpahan ka kolot, hirupna bakal enggeusan, lir palita anu pes pareum di nu poek.

²¹Harta banda mah beuki gampang disiarna, beuki kurang mangpaʼatna.

²²Ulah hayang ngabales ka nu nyilakakeun. Anggur sanggakeun ka PANGERAN, Mantenna anu baris ngalereskeun.

²³PANGERAN mikagiruk ka jalma nu make timbangan palsu jeung malsu timbangan.

²⁴Pimanaeun manusa bisa nyaho kana tincakeun hirupna, sabab lengkah-lengkahna PANGERAN anu nangtukeun.

²⁵Memeh aya panadaran ka PANGERAN, timbang heula masing asak, sangkan henteu kaduhung ahirna.

²⁶Ku raja anu binekas mah nu boga salah teh kauninga sarta dihukum teu dipikarunya.

²⁷PANGERAN ka urang maparin budi rasa reujeung ati sanubari. Urang moal bisa sumput salindung.

²⁸Raja baris tetep kawasana, satungtung marentahna jujur, bener, adil.

²⁹Ka barudak ngora katarik teh ku kakuatanana, ari ka nu karolot hormat teh ku karana huisna.

³⁰Ngarobah cara hirup teh sakapeung mah matak kacida peurihna.