Read Boros Dusun SILOKA 21 Bible Online

SILOKA 21 - Boros Dusun bible

SILOKA 21

¹PANGERAN mah ngamudi manah raja ge gampileun. Sarua gampileunana jeung ngatur ngocorna walungan.

²Meunang boga rasa yen sagala panggawe maneh hade, tapi inget, nu ditilik ku PANGERAN mah alesanana.

³Lampahkeun naon nu hade, naon nu jujur, baris kamanah ku PANGERAN leuwih ti batan mere kurban.

⁴Jalma jahat dikawasaan ku kaadigungan jeung kasombonganana, eta teh dosa.

⁵Rarancangkeun sing asak, sangkan mucekil. Bari gurunggusuh mah beubeunanganana moal sabaraha.

⁶Kakayaan beunang teu jujur tereh leungit, tapi memeh leungit teh ngagubragkeun urang heula kana liang kubur.

⁷Jalma jahat baris cilaka ku katelengesanana sorangan; maranehna cadu kana lampah bener.

⁸Jalma jahat nyokot jalan anu serong, jalma nu suci beresih mah lampahna teh bener.

⁹Mending cicing di luhur hateup, ti batan saimah jeung pamajikan cerewed.

¹⁰Jalma jahat mah salawasna ge kabeukina teh kajahatan, ka nu lian taya pisan karunyana.

¹¹Hukuman ka nu adigung, jadi pangajaran ka nu taya luang. Jalma berbudi dipepelingan teh jadi tambah bijaksana.

¹²Allah nu maha adil terang kana kaayaan di imah jelema jahat. Mantenna bakal ngagebruskeun manehna sina cilaka.

¹³Lamun urang embung ngadenge jumeritna anu sangsara, engke mun urang sasambat menta tulung, moal aya nu malire.

¹⁴Jalma anu ambekeun ka urang, anteuran rerencepan, engke amarahna leler.

¹⁵Jelema hade mah mun kaadilan jalan teh atoh, sabalikna nu jahat mah hanjelu.

¹⁶Jalma nu teu make pikiran sehat, bakal tereh paeh.

¹⁷Resep mewah, beuki mabok, dahar royal bae, matak moal beunghar-beunghar.

¹⁸Jalma jahat baris cilaka ku kajuliganana sorangan anu tadina rek dipake nyilakakeun jelema nu bageur.

¹⁹Mending miceun maneh ka gurun keusik, ti batan hirup jeung pamajikan tukang humandeuar jeung cerewed.

²⁰Jalma binangkit, hirupna subur makmur. Ari jelema gejul mah harita meunang duit, harita beak.

²¹Sing bageur, sing someah, tangtu panjang umur, nu lian ge tangtu ngajenan jeung jujur ka urang.

²²Panglima anu pinter, bisa ngarampas kota anu dibela ku nu garagah, bisa ngancurkeun benteng nu jadi andelan maranehna.

²³Mun embung meunang susah, kudu ati-ati nyarita.

²⁴Jalma angkuh mah sombong, adigung, jeung tara mikirkeun batur.

²⁵Jalma kedul, nu embung digawe, sasat maehan maneh,

²⁶gawena teh ngan wungkul ngalamun hayang beunghar. Ari jelema nu bener mah balabah tur mere maweh.

²⁷Kurban ti jelema jahat ku PANGERAN dipikageuleuh. Komo lamun merena teh ku sabab aya anu dipamrih.

²⁸Panyaksi ti jelema tukang bohong moal diandel. Sabalikna caritaan jelema nu asak pikir mah bisa ditarima.

²⁹Jelema anu bener mah teteg moal raga-reugeu. Sabalikna jelema jahat mah mani kudu satekah polah narekahan sangkan dipercaya.

³⁰Kawijaksanaan, uteuk encer jeung pangarti manusa, dibandingkeun jeung PANGERAN mah teu aya pisan hartina.

³¹Kuda perang, urang anu nyadiakeunana; tapi ari nu mere kaunggulan mah PANGERAN.