Read Boros Dusun SILOKA 26 Bible Online

SILOKA 26 - Boros Dusun bible

SILOKA 26

¹Muji jelema gejul mah teu merenah, ibarat salju dina musim panas, lir hujan dina musim panen.

²Panyapa nu salah larap moal teurak, ibarat manuk galabar-geleber teu manggih keur eunteup.

³Kuda nurutna ku pecut, kalde ku kadali, ari nu gejul ku pepentung.

⁴Nu ngajawab pananya anu mahiwal sarua mahiwalna jeung nu nanyana.

⁵Pananya anu mahiwal, jawab ku nu mahiwal deui. Ku nu nanyana bakal karasaeun yen geuning dirina teh henteu pinter sakumaha panyangkana.

⁶Mihapekeun beja ka nu gejul, sarua jeung neukteuk suku sorangan, nu repot sorangan keneh.

⁷Saperti nu lumpuh ngagunakeun sukuna, nya kitu keneh lamun nu gejul ngucapkeun siloka.

⁸Mere hormat ka nu gejul, sarua bae jeung nalikeun batu kana bandring.

⁹Mun anu burung nyutat ucapan nu munel, moal beda ti nu mabok rek nyabut cucuk tina leungeunna.

¹⁰Ngahiras gawe ka jelema gejul anu kabeneran ngaliwat, kalah matak pusing sarerea.

¹¹Anu gejul sok mindoan kagejulanana, cara anjing malikan utahna.

¹²Leuheung keneh jelema nu pangbodona, ti batan jelema anu ngarasa pinter padahal henteu.

¹³Naon sababna anu kedul resep ngahekok di imah? Naha aya kasieunna, sugan sieuneun kerud?

¹⁴Jelema kedul karesepna galaha-gelehe di enggon, cara panto galar-gilir dina engselna.

¹⁵Aya jelema anu ku kedul-kedulna, nepi ka hoream ngahuap cape.

¹⁶Jelema kedul sok boga angkeuh leuwih pinter batan tujuh jelema anu bisa ngabela pamanggihna.

¹⁷Jalma anu sok pipilueun kana pacengkadan nu lain urusan sorangan, ibarat ngajambret ceuli anjing anu pareng liwat.

¹⁸Jeg nu edan ngamang-ngamang gobang,

¹⁹nya kitu jelema anu ngalejokeun bari majarkeun teh ngan pangangguran.

²⁰Seuneu lamun henteu disuluhan mah pareum. Pasea lamun henteu disundutan mah eureun.

²¹Ruhak lamun diarengan ruhay, seuneu lamun disuluhan ngagedur, pasea lamun dihucuhkeun beuki rongkah.

²²Aya ku genah ari ngadengekeun upatan! Mun kongang mah mani hayang nyamualkeun.

²³Ngaku sono ukur biwir padahal hatena henteu, teu beda ti pariuk taneuh dipulas herang.

²⁴Aya jalma anu pura-pura muji, padahal hatena mikageuleuh.

²⁵Kade tong dipercaya najan pamujina genah ge, da hatena mah ngentab-ngentab ku kangewa.

²⁶Bisa pisan nyumputkeun kangewana teh, tapi kagorenganana moal teu kapanggih.

²⁷Anu julig ka batur tangtu cilaka ku kajuliganana sorangan, cara anu ngali gawir tangtu kaurugan.

²⁸Ngabohongan batur sarua jeung mikangewa. Omongan jalma dengki temahna ngan nyilakakeun.