Read Boros Dusun SILOKA 30 Bible Online

SILOKA 30 - Boros Dusun bible

SILOKA 30

¹Ieu pitutur Agur putra Yakeh: ”Kuring teh jauh ti Allah, jauh ti Allah, nu matak henteu daya teu upaya.

²Saenyana kuring teh bodo alah batan sato, henteu boga budi akal cara lumrahna manusa.

³Sim kuring tara guguru ngumpulkeun elmu, ka Nu Maha Suci luput teu aya katerang.

⁴Saha anu geus nyaho kana kaayaan sawarga? Saha anu bisa ngeupeul angin? Saha anu bisa mungkus cai ku jubahna? Saha nu geus nangtukeun wawatesan jagat? Cik saha, sugan maneh nyaho? Jeung saha anakna?

⁵Allah teh pageuh nyepeng sabda-Na. Mantenna lir tameng keur sakur anu nyalindung ka salira-Na.

⁶Poma ulah nambahkeun naon-naon kana pangandika-Na, anu ku Mantenna henteu diucapkeun, sangkan anjeun teu disiksa lantaran kauninga bohong.”

⁷Gusti, samemeh abdi mulang ti dunya, sumeja nyuhunkeun dua perkawis.

⁸Saperkawis tebihkeun abdi tina ngabohong. Kalih perkawis ulah dikersakeun miskin, ulah dikersakeun beunghar. Paparin sacekapna bae.

⁹Bilih ari beunghar mah ngunghak, nyebat teu wawuh ka Gusti. Ari miskin bilih abdi maling, matak lingsem ka lenggah Allah.

¹⁰Ulah mitenahkeun badega ka dununganana, bisi maneh ku itu disapa, heug bae nandangan lara.

¹¹Aya jelema anu nyumpahan ka bapana, sarta ka indungna henteu ngajenan.

¹²Aya jelema anu ngarasa dirina suci, padahal kacida kotorna.

¹³Aya jelema anu ngarasa jadi jelema anu hade, kacida hadena ceuk rarasaanana mah!

¹⁴Aya jelema anu teu boga pisan rasrasan, meres ka nu masakat walurat, dijieun jalan pangupajiwana.

¹⁵Lentah anakna dua, duanana bikang, duanana ngaranna ”Jang aing!” Aya opat rupa hal anu tara seubeuh-seubeuh, nya eta:

¹⁶Alam maot, awewe nu teu bisa boga anak, tanah garing nadah hujan, jeung seuneu anu keur ngabulak-bulak.

¹⁷Jelema anu ngunghak ka bapa atawa moyok ka indung pedah geus kolot, sing dihakanan dagingna ku heulang atawa dipacokan matana ku gagak.

¹⁸Aya opat rupa hal anu ku kami sama sakali henteu kaharti, nya eta:

¹⁹Jalan heulang di awang-awang, jalan oray dina batu karang, jalan kapal di lautan, jeung awewe reujeung lalaki anu eukeur mikacinta.

²⁰Akal awewe anu serong ti salaki nya eta: Tas ngaranyed buru-buru beberesih. Ari ngakuna, ”Kuring teu salah teu naon!”

²¹Aya opat rupa hal anu ku dunya oge henteu bisa ditarima, nya eta:

²²Lamun badega jadi raja, lamun nu gejul loba hakaneunana,

²³lamun awewe pikaijideun meunang salaki, jeung lamun babu ngalindih dunungan awewe.

²⁴Di bumi aya opat rupa sato lembut, tapi kacida palinterna, nya eta:

²⁵Sireum, naon tanagana, tapi ari keur halodo garetol ngumpulkeun rejeki.

²⁶Peucang, naon tanagana, tapi ngenggonna mah di jero cadas.

²⁷Simeut, euweuh rajana, tapi ana geus ngabrul mani beres kawas diatur.

²⁸Cakcak, gampang pisan ditewakna, parandene kitu di karaton-karaton ge aya.

²⁹Aya opat anu leumpangna pikaresepeun, nya eta:

³⁰Singa, panggagahna ti sakabeh sasatoan tur euweuh kasisieunna.

³¹Embe jalu, hayam jago, jeung raja anu keur tatandang di hareupeun baladna.

³²Lamun maneh adigung jeung boga niat nyieun kagorengan ku bawaning gejul, geuwat eureunan sarta mikir.

³³Sabab: Manasina susu ku maneh dikocok, jadi mantega. Ari maneh ngetig irung batur mah bocor getihna. Ari nyieun piambekeun batur mah maneh cilaka.