Read Boros Dusun SILOKA 31 Bible Online

SILOKA 31 - Boros Dusun bible

SILOKA 31

¹Ieu pitutur ti ibuna Raja Lemuel, waktu ngawurukan ka anjeunna. Saurna,

²”Anaking, buah ati ibu beunang ibu neda-neda ka PANGERAN! Rek ngomong naon cik, ibu ka hidep teh?

³Ulah miceunan tanaga ngalajur pangajak birahi, ulah ngawur-ngawur artos ka istri. Geus rea raja anu ragrag ku istri teh.

⁴Regepkeun Lemuel, anaking! Raja henteu sae sedep anggur atawa katagihan arak.

⁵Sabab ana raja mabok, lali kana hukum, ngalalaworakeun hak rahayat nu walurat.

⁶Arak mah ngan keur nu sakarat atawa keur nu katalangsara,

⁷sangkan poho kana kamiskinanana, paler kasedihna.

⁸Sing bisa jadi wawakil rahayat anu teu mampuh cumarita sorangan. Tangtayungan hak rahayat nu taya daya.

⁹Pangnepikeun kapentinganana. Sing jadi hakim nu adil, kersa nangtayungan hak rahayat nu balangsak jeung walurat.”

¹⁰Wanita binangkit keur pibojoeun teh langka, bangga meunangkeunana. Bojo kitu pangajina ngungkulan batu permata.

¹¹Salakina bisa numplekkeun kapercayaan ka manehna, nu matak salakina babari meunang rejeki.

¹²Ka salaki sumujud saumur hirup, moal nganyenyeri.

¹³Tara daek reureuh, ngagintir kapas atawa bulu domba, nyieun pakean.

¹⁴Ngadatangkeun rejeki, ibarat kapal sudagar ti tempat jauh.

¹⁵Subuh-subuh geus kerah-kerih, nyadiakeun dahareun keur sakulawarga, bari metakeun badega-badega awewe kana gawe.

¹⁶Ana hayang lahan geuwat bae meuli, tuluy dikebonan dipelakan anggur, binihna beunang meuli ku duit ladang beubeunangan digawena.

¹⁷Digawena rajin, taya kacape nepi ka anggeus.

¹⁸Kana barang bubuatanana bisa ngahargakeunana, dipigawena nepi ka peuting.

¹⁹Papakeanana nyieun sorangan, ti nganteh nepi ka ninunna pisan.

²⁰Ka nu walurat balabah, ka nu kekere resep mere.

²¹Ku usum tiris teu inggis, kawantu baju haneut keur anak jeung salaki geus sadia.

²²Tilam kasur ge nyieunan. Barang pakena tina lawon lenen wungu anu lemes.

²³Salakina jadi kawentar, jadi salah saurang warga kota anu penting.

²⁴Sajaba ti keur pakeeun, eukeur jualeun ge nyieunan, boh papakean boh angkin.

²⁵Awakna jagjag waringkas. Dirina kaajen, tur teu salempang ku pikahareupeun.

²⁶Ngomongna lemah lembut, ucapanana bijaksana.

²⁷Salilana resep kana digawe, sagala kaperluan kulawargana ditalingakeun.

²⁸Ku anakna dihormat, ku salakina dipuji.

²⁹Ceuk salakina, ”Istri hade keur pibojoeun teh rea. Tapi Euis mah pangutamana.”

³⁰Rupa endah teu jadi andelan, kageulisan bisa leungit, tapi ari istri ajrih ka PANGERAN mah jadi pamujian.

³¹Sagala lampah katut pagaweanana wajib dihargaan. Manehna layak dihormat ku sarerea.