Read Boros Dusun SILOKA 5 Bible Online

SILOKA 5 - Boros Dusun bible

SILOKA 5

¹Anaking, tengetkeun jeung regepkeun ieu hikmah jeung pangarti ti Bapa,

²Tangtu hidep engke nyaho kumaha kuduna mawa diri sarta kumaha kuduna nyarita, nyirikeun yen boga kanyaho.

³Biwir pamajikan batur kareueutna lir madu, nyiumna lemes lir lemesna minyak jetun.

⁴Tapi dina sanggeusna, ngan kari paitna, kari peurihna.

⁵Awewe kitu bakal nyered maneh ka tempat nu maot, da leumpangna ge moro ajal.

⁶Dirina henteu tetep dina jalan anu nuju kana hirup, tapi sasab ngalantur, tapi teu ngarasaeun yen ngalantur.

⁷Ku sabab eta dengekeun, barudak! Bapa arek ngomong deui. Kade ulah aya anu poho.

⁸Awewe kitu singkiran! Malah ka imahna ge ulah deukeut.

⁹Lamun maraneh ngalayanan, tangtu leungit kahormatan, tur bakal paeh ngora-ngora ku jalma nu taya karunya.

¹⁰Kakayaan maraneh bakal dicokot ku batur, beubeunangan usaha bakal kapiboga ku nu sejen.

¹¹Tungtungna ari awak geus beak ku panyakit, maraneh ngan bisa udah-aduh,

¹²bari ngomong, ”Ku naon atuh aing teh ijid kana nasehat? Ku naon make embung dipepelingan?

¹³Aing embung ngagugu ka guru-guru, embung nurut ka aranjeunna.

¹⁴Nyaho-nyaho aing teh geus hina dina panenjo jalma rea.”

¹⁵Anu matak sing satia ka pamajikan. Kanyaah teh tamplokkeun ka dinya wungkul.

¹⁶Anak ti awewe sejen mah moal aya pigunaeunana ka hidep.

¹⁷Anak sah nu kudu dimumule teh, sina gede, ngarah engkena bisa ngabantu-bantu, lain nu sejen.

¹⁸Anu matak sing ngarasa bagja ku pamajikan. Teangan kasukaan jeung mojang anu ku hidep dikawin,

¹⁹mojang manis jeung tangginas lir mencek; sing katarik ku geulisna, jeung sing bagja ku cintana.

²⁰Keur naon anaking micinta awewe sejen? Keur naon leuwih kapincut ku kageulisan pamajikan batur?

²¹PANGERAN maha uninga kana sagala kalakuan hidep. Ka mana ka mana ge hidep hamo leupas tina panalingaana-Na.

²²Dosana jelema jahat teh lir tataheunan nu bakal ngajiret dirina sorangan,

²³tungtungna paeh lantaran teu bisa ngawasa diri. Ku tina bodo-bodona ahirna tigebrus ka liang kubur.